Shah kem u nongbylla, uba dawa pisa T.2 lak bad thmu pyniap ia u kynrad

Jowai: Ki pulit jong ka West Jaintia, ki la kem ia uwei u briew, uba thmu ban lute pisa T.2lak na u trai jongu, uba la ai kam ia u hi.

“U la phone ia u, na uwei pat u number bad ula byrngem ban than ia ka kali jongu, namar ban pyniap ruh ia u, lada jia ba um siew ia katei ka pisa” ong ka khubor.
Ia utei u briew, uba la kem la tip, ba u dei uba kyrteng U Everist Dkhar( 26) na shnong Pasyih bad mynta u shong u sah ha Thadmuthlong A ha East Jaintia Hills.
Ki pulit ki la riam ia u, ha ka por ba u thmu ban leit shim pisa na Rajasthan Hotel, hynrei ula lait phet noh ha katei ka por ba la pynap bha da ki pulit, katba mynta ka step, ki pulit, ki la leit ban kem ia u, na iing jong ka tnga jongu, ha Thadmuthlong.
La iathuh ba U Everist, ula phone sha la u jong u kynrad, ha ka 28tarik Iaiong 2019 bad kumta ki pulit ki la riam ia u, ha ka 29tarik Iaiong, kaba dei ha ka sngi kaba bud, tangba ha katei ka miet, ula lait phet noh bad dei tang mynta ka sngi, ba ki pulit ki la ioh kem noh ia u.