Ki thuk thuk kamai ha Shillong

Bah Monarch Shabong

Ka la poi sa ka pali kamai jong ki thuk thuk ha Shillong bad ngim tip la kitei ki thuk thuk, kin poi shaei ha ka jingiaid lynti jongki, hynrei ka shu long tang ka jingjia, kaba ngin ia kynmaw shakhmat.
Ki bos iew lane ki city bos, ki la dei ki nong kit briew kiba la slem tam ha ka nongbah Shillong bad ki la iaid sha Mawlai, sha Laitum khrah, sha Umpling, sha Mylliem, sha Smit bad kumta ter ter bad ha katei ka por, ka jing kyrkieh ka dang kham duna shi katdei, ha kaba la ju kynmaw ia ka jing ia sin ia ki bos Mawlai, ba kim ju don back gear, namar ba ki tyllun na Motphran sha Mawlai bad ki poi ter ter sha Polo bad ki poi biang sha Motphran.
Kam dei tang katta, hynrei ki bos wei ba ki lah ieng ha Khyndai lad, ha Barik, ha Laitumkhrah bad kumta ter ter, ki don bun ki nong shong kiba ioh thiah, namar ba wei ba ki lah ieng, ki ieng shi slem shi slem bad ka ju long ruh ka rukom jong ki nongbud, ba kin pyniaid shi jam ia ki bos bad ki sa pynsangeh biang bad kitei ki dei ki por jong kito ki bos iew kiba mynshwa.
Hadien kata, ki la wan sa ki bos saw bad kitei ki la pynsniew lut ia ka kamai ki bos iew bad kitei ki la poi lut sha ki shnong ki thaw, ki mareh la kum ki skei, ha ka por ba ki dang shu mih thymmai ha u snem 2011, hynrei mynta, kitei ruh ki la jah rngi bad hangta, ka la mih ka huri hura bad ka jingshim kabu, kaba jur jong ki taksi kamai.
Mynta ka Shillong ka la khapngiah bad ka leit ka wan, ka la kordit tasam haduh katta katta bad ha kaba kum katei ka kutlad, la iohi, ba la wan mih sa kitei ki ar shaka bad kitei te kin kit briew beit tang uwei bad uto uba iaid marwei, ula kham suk mynsiem shibun, namar ba u lah ban poi biang por, haba leit donkam sha ki dong bapher ha Shillong, hynrei ia uba ialam khun, uba ia leit donkam ha iing lane uba kit ia ki tup ki tam, un nym lah lait na ka jing ia thyngngian bad ka dheng kali kumba long baroh shi katta.
Haduh mynta, ngim tip ia kaei ka jingmut jong ka tnat ka kit ka bah, lyngba ka jing pynmih ia kitei ki kali ar shaka, hynrei ka don ka jingeh, namar ba kitei ki iaid lymmuh, ki iaid sha ka liang kiwei bad ki tur na ka diang bad na ka mon bad katei ka pyndik tyngeh ia ki nongniah kali heh.