Nongstoiñ: Hadien ka jurip ba kyndit da ki nongialam jong ka seng ki samla pule jong ka West Khasi Students Union (WKSU) ia ka skul Sibsing Memorial Govt HSS, ki la lap ba katei ka skul pule hapoh ka jingkhmih jong ka sorkar jylla ka dap da kiba bun ki jingduna kum ka jingbymdon ki nongpeit ba pura ha katei ka skul ka jingbymdon ia ka/u Principal ba pura bad kiwei kiwei.
Katkum ka kyrwoh khubor na u President ka WKSU u bah D. Sunn la ong ba ka Seng ka la lap ruh ba ki don haduh ar ngut ki nonghikai kiba la shong thait bad shah pynkynriah kam noh na katei ka skul kiba kynthup ia ka post Asst. Lecturer ha ka subject Khasi (MIL) bad kawei ka kam Asst. Lecturer ha ka subject Biology jong ka Higher Secondary School la kumba saw san bnai tam mynta hynrei haduh mynta ym shym pat la don nonghikai satia ha kitei ki ar tylli ki subject kaba la buh jingeh ia ki khynah pule ha katei ka skul.
Shuh shuh u la ong ruh ba halor katei ka jingbym don nonghikai ha kitei ki ar tylli ki subject kala pynlong ia ki khynnah pule katei ka skul ba kim lah shah shuh haduh ba ki la nud ban leit ujor wat haduh ki bor pyniaid jong ka tnad pule puthi jong ka thaiñ.
Ha kaba iadei bad katei ka bynta na ka liang jong ki nongialam ka seng, ki la leit ruh ban ia kynduh ia ka Principal Incharge katei ka skul ha kaba naka liang jong I la ong ba ka daw ym lah ban thung ia kitei ki nonghikai kat kum ka jingdon kam ha kitei ki subject Khasi bad Biology ha ka Secondary level ka long ba ym pat lah ban leh eiei da ka sorkar, namar ia mynta ka sorkar ka dang pynjari da ki kyndon Election Code of conduct ha ka jylla baroh kawei bad kala ong ruh kyrmen ba hadien ka result Election MP jong mynta u bnai bad u snem shen yn sa lah ban ban pynbiang ia ki nonghikai ba pura ha katei ka skul.
Ha kawei pat ka bynta na ka liang jong ka seng kala lap ha katei ka jingleit jurip ka long ba katei ka skul ka dang pyndonkam sah ban pynlong skul da ka buillding bala rim (Assam Type House) naduh ka por ba mynshwa bad haduh mynta khlem da don kano kano ka jingmaramot ia ka jingjot jingpra haki kamra class bapher pher bad haki jingkhangit.
“Ka jingtor jong katei ka iing skul kan wan rah ia ka jingma kaba khraw ia ki nongtrei ha katei ka skul bad khamtam eh iaki khynnah skul, lada wan lyngshop ki bor mariang bad lada jia eiei ia ki khynnah skul bad ki nongtrei katei ka skul ka sorkar kaba la long kynrad ia katei ka skul kan hap ban shim jingkitkhlieh” ong u samla D. Sunn.
Kumta ka seng ka dawa na ka sorkar jylla khamtam ia u Myntri Rangbah u Conrad K. Sangma u ba long ruh u dkhot jong ka NEC bad ruh ia u Myntei ka tnad pule puthi u Bah Lakmen Rymbui bad khamtam ia u MLA ka thaiñ u Bah Macmilan Byrsat kumba u la leit jurip teng ia katei ka jingieh shrah ia katei ka skul da ka sorkar jylla ba kin shim khia bad ia pyrkhat bniah kham kloi ban pynbiang pura ia katei ki jingdonkam jong katei ka skul.
Phi don ban ong eiei?