Hadien ka jingkhlad noh jong u syiem Dabid ki judah ki la thung syiem ia u Dabid. Haba u la synshar ia ki kumba hynniew snem kiwei pat ki jaid Israel ruh ki la mynjur ban ithuh syiem noh ia u.Ka thong kaba hakhmat eh jong u kum u syiem ka hima Israel ka long ban iohknieh noh ia ka Jerusalem . U la pynkhlain ia ka kynhun shipai .Ha kata ka por ha Jerusalem la shong la sah da ki jebus ki briew ki bym dei ki israel bad la tip ruh ia ka kum ka nongbah ki jebus. Ym shym la don hangta wat tang kawei ruh ka jaid israel. Ka jingkut jingmut baskhem ka la neh hapoh jong u syiem Dabid ba u dei ban iohknieh noh ia ka Jerusalem na ki jebus bad un pynlong ia ka kum ka nongbah jong ka Israel. Ia ka jerusalem la ker da ki kut bad ki kynroh kiba skhem bha ha baroh ki liang.Ki nongshun kim iohlad ban rung shapoh namar kita ki kynroh ki shakri kum ki nongiada kiba biang tam ia ka nongbah baroh kawei. Ban rung shapoh jongka dei tang na ka khyrdop bad shisien ba la khang ia ka ym don shuh da kawei pat ka lad. Haba ki jebus ki la ioh jingtip ia kata ka jingthmu jong u syiem Dabid ki la ibein bad ipoh jur ia u. Ban pyni ba ki israel kin ym ioh daleilei ruh ban knieh noh ia ka Jerusalem na ki bad da ka mynsiem ba sngewsarong ki la buh pahara da ki dkoh bad da ki matlah ha baroh sawdong ki kynroh jong ka nongbah. Ki la mynthi ruh ia u Dabid ,”Men ym ioh wan shane lymda men shim noh ia kiba matlah bad kiba dkoh.”[2 Samuel 5:6]. Ki la khang skhem bha ia ka khyrdop heh bad kumta kim don shuh ka daw ban sngewsheptieng bad ban sngewkhuslai. Ka mynsiem jong ki ka suk jai jai namar ki pyrkhat ban iohknieh ia ka Jerusalem ka dei tang ka jingmutdur bieit u syiem ki Israel. Kumno ki nongshun kin ioh ban wanrung shapoh namar ym shym plie ia ka khyrdop. Ki sngewskhem ba ka jingshahknieh noh kan ym jia bad kin ym duh noh lano lano bad hano hano ruh ia ka jinglongtrai ia ka Jerusalem. Ka Jerusalem ka dei ka nongbah ka bym ju mad ia ka jingkyrduh um namar ka don ha ka ia ka Gihon ka umpohliew ka bym ju thait bad ka bym ju rngad. Wat ki jebus ruh ki sngewthuh ba kata ka jingpahuh um ka khring ia kiwei pat ban ikwah ia ka nongbah jong ki. Da ka jingiatreilang jong ki nongshongshnong ka nongbah ki la shna ka kut jingiada ia ka Gihon baroh sawdong .Ki la shna ruh de sa uwei pat u nala um [TZINOR] na ka nongbah uba hiar arsut shapoh haduh ba un da iakynduh lang bad kata ka kut ha Gihon. u syiem Dabid u dei u nongsainhima uba proh bad u nongialam uba shembuit.U tip ba dei satang uta u nala marwei hi uban long ka lynti ia ki israel ban iohrung shapoh Jerusalem. U kular hakhmat ki shipai jong u ba uno uno uba nud ban leit kiew nyngkong eh sha Jerusalem ia uta yn pynlong u khliehduh jong ka kynhun shipai Israel. u Joab Ben Zeruyah u shipai bashlur bad ba satar u la wan shakhmat ban leh ia kata ka kam. u Dabid u la bthah ia u Joab ba un leit sha Gihon bad haneng ka kut un lap ia uwei u nala um. u dei ban rung ialade shapoh uta u nala bad kiew beit beit shajrong da kaba bud ia u haduh ban da poi shakliar . Khlem kano kano ka jingsngewsyier u joab u la leh thik kumba la bthah da u syiem. Haba u la shem ia uta u nala u la rung shapoh . u la kiew shajrong katkum ka jingialam jong u nala.Ynda u la poi ha kliar u la iohi ia ka nongbah Jerusalem, Ki jebus kim shym la buh jingkhang hangta bad la shu ieh rynghang ia u. u Joab u la mih noh shabar nangta bad mynta u la ioh ban iuhkjat ha ka nongbah ki jebus. Ki jebus ki bym shym la peitngor bad shimkhia kim iohi satia ba u nongshun u la don hapoh bad ka jingma bakhraw ka ap ia ki. u Joab u la mareh sted sha ka phang ba ka khyrdop heh ka don bad u la plie ia ka . Ki shipai israel kiba la pynkhreh bha ialade ki la ap lypa habar. Tang mar ia plie ka khyrdop buk ki la rung kynsan shapoh. ki jebus ha ka jingbym poi pyrkhat bad ka jingbym pynkhreh ki la kulmar thlim. Ha shuwa ba kin sngewthuh kaei kaba ki dei ban leh ki israel ki la da ioh ia ka jingjop bad ki la kurup noh ia ka jerusalem na ki kti jong ki. Kim lah shuh ban leh eiei hynrei tang ban shu pdiang ia ka namrem .Ki la duh noh ia ka nongbah Jerusalem bad mynta ki la hap ban demsyiem noh ha u Dabid. Hadien kata ka jingshahkurup noh ia ka Jerusalem la khot ruh Ka Nongbah U Dabid. u solomon u ong,”Ka jingsarong ka leit ha shuwa ka jingjot bad ka mynsiem ba sngewmeng ha shuwa ka jingkyllon.”[Proberb 16:18]. Kane ka dkhot u solomon u thoh shaphang ki jebus ban pyni ba ka daw ba shisha ha lyndet ka jingshahrem noh jong ki ka dei ka jingsarong. u syiem Dabid u jied ia ka Jerusalem ban long ka nongbah jong ka Israel namar ka jingdap jingbiang jong ka um. Ka um ka dei ka jingdonkam ba kongsan tam ia baroh. ka umpohliew Gihon ka dei ka tynrai jong ka jingpahuh um ka nongbah. ka ai shibun eh ka um. u syiem Dabid u jied ruh ia ka Jerusalem namar ka dei ka jaka ba longpdeng bha ia ka nongbah baroh kawei. Hashuwa ka jingshahkurup noh dei tang ki jebus kiba don hangta. kumta u sngewthuh ba lada hangta un pynlong ka nongbah ka hima baroh ki khun israel kin don kajuh ka jngsngew. kan ym don ka jaid kaba lah ban pynpaw ia ka jingsngewtrai hangta bad kawei pat ka jaid kan ym sngew nongwei hynrei baroh kin ialong kumjuh. La jied ruh hangta namar ka lah ban ai ka jingiada bad ka jingshngain na ki nongshun. Kito ki kynroh bad ki kut baskhem ki dei kiba biangtam ban khanglad ia ka jingiohrung ki nongshun. u syiem Dabid u jied ruh ia ka Jerusalem namar dei u Blei uba la jied nyngkong ia ka, “Nga la jied ia ka Jerusalem ba ka kyrteng jong nga kan ioh long hangta.”[2 khronikl 6:6]. Ha u snem 1867 u sir Charles Warren jong ka Palestine Exploration Fund[PEF] u la sdang ia ka jingtih bad ka jingwadbniah ha ki bynta jong ka Temple Mount .Ia ka jingtrei jong u la pyrshah jur da ka Ottoman Authorities.Namar kata ka jingpyrshah u la kynriah noh sha ka phang shathie jong ka Temple Mount. Ha kata ka jingwadbniah hangta u la lap ia uwei u nala uba jrong bha. U la buddien bad pule bniah. Na kata ka rukom long jong u u sir Warren u sngewthikna ba uta u dei u nala jong u Hesekaiah [THE HESEKIAH TUNNEL]. Ha ka jingsynshar jong u Hesekaiah u iohi ia ka jingsdang wanhiar jong u syiem Sennakherib sha u pud u sam jong ka Israel. U sngewthuh ba ka hima jong u kan sa ia kynduh jingeh. Kumta ka jingpynkhreh ka long kaba donkam palat. Kawei kaba u tip shai ka long ba lada ka jingshah kerkut ka jia ka jingdonkam bakhraw tam ia baroh arliang -ka liang kerkut bad ka liang shahkerkut ka dei beit ka um, um shym la kwah ba ki nongshun jong u kin ioh shibun eh ka um. Kumta u bthah ia la ki briew jong u ba kin shna uwei u nala uba sdang na Gihon shaduh Siloam ka pung kaba ha Jerusalem. Ka jingthmu jong uta u nala ka long ban wanrah noh ia ka um tang hapoh ka nongbah hi. ka um kan ym tuid ne mih shuh shabar. Uta u nala u jrong kumba sanspah laiphew metar.Da kaba leh kumta ki israel ki pahuh bha ka um hynrei ki Assiria kin ym ioh eiei. Nalor uta u nala jong u Hesekaiah u sir Warren u la lap sa uwei pat u nala uba kiew shajrong . u la rung bad kiew shakliar nangta napoh u nala uba jrong kumba sanphew metar. Ynda u la poi hakliar u iohi ba u lah ban mih shabar bad u ruh u la mih. Shisyndon u sngewthuh shai ba mynta u la lap ia ujuh u tzinor ba u Joab u pyndonkam mynba u kiew sha Jerusalem. kumta kata ka jaka ba ki kjat jong u ki dang ieng ka dei Ka Nongbah U Dabid. Kumba arhajar snem ia ka la buhrieh noh bad ym shym don ba tip ia ka jaka ba shisha jong ka. Kata ka jinglap jong u sir Warren ka iathuh bad pynthikna ia baroh hangno Ka Nongbah U Dabid ka don. Ka don ha ka phang shathie lam mihngi na ka Temple Mount. Hadien jong u sir Warren bun tylli ki kynhun ki dang pynlong ia ka jingwadbniah ha kata ka nongbah ba la shem pat.
|
Phi don ban ong eiei?