Nongpoh: U Bah Welbirt Rani, President ba rangbah ka FKJGP, Sengkmie, u la ong ba ka seng ka pynrem jur haor ka jingshah thombor ia u Bah Micheal Warjri, Secretary ka Hima Nongspung bad uba shong ba sah ha shnong New Balakhwa ha Ri Bhoi.
Ki kot ki sla ba donkam u Bah Micheal Warjri kiba la shah thang noh hynnin ka sngi:Rupang
U la ong ruh ba FKJGP ha ryngkat ka jingsynran kiba haiing jong utei u Secretary ka Hima Nongspung, mynta ka sngi ki la leit ban kynduh ia ka Kong RM Kurbah, Deputy Commissioner ka Ri Bhoi, ha kaba ki la ioh ruh ban pynsngew ia shibun ki jingdawa kaba la seng ka la buh.
“Ngi la kyntu ia ka DC ba ka dei ban phah kem mardor ia kito kiba donkti bad ha kajuh ruh ka por ngi la dawa ruh ia ka DC ba ka dei ban shimkhia bha halor kane ka kam bad kata ka long ban pynsngew sha ka sorkar” ong U bah Rani.
U Bah Welbirt Rani, u la ong ruh ba ka seng ka sngewkhia ban iai iohsngew ia ka jingshah thombor ki paradoh parasnam ha manla ki jaka kiba don ha khappud bad ka Assam, kata lada phai sha ki thain Langpoh, Block-2 bad Block-1 ruh kumjuh.
“Lada ka iai long ha kane ka rukom, ka por kan sa poi ba ki paidbah ha khappud ba kin tieng bad namarkata kin sa leit ban rejister noh ia ki jaka jongki sha Assam” ong u Bah Welbirt Rani.
Ka seng ka pynrem ruh halor ka jingshah kem u Bah Michael Warjri ha ki pulit Assam, halor kane ngi pynrem ia ka sorkar jylla ka bym shem la shimkhia lada don kiba kum kitei ki jingjia, namar ha manla ba don ki kam huri hura ha ki thain Khappud, bunsien hi ki Khasi ki ju shah rah beit ha ki pulit ka Assam
Halor katei ka jingjia ha New Balakhwa kaba hap hapoh ka Hima Nongspung, ki nongialam ka seng, kin sa leit ban iakynduh ia u CEM bad ha kajuh ruh ka por kin sa leit ban kynduh ia u Myntri rangbah lane synbud myntri rangbah jong ka sorkar jylla.
Ha kawei pat ka liang, ha ka jingiakren bad U Syiem jong ka Hima Nongspung, U Paiem Patrick Syiemiong, u iathuh ba haduh mynta, um da tip bha halor katei ka jingshah ktah kti jong U bah Michael, hynrei, u shu shim, ba ka dei kaba u pyrshah, halor ka jingthmu jong ka sorkar Assam ban shna surok sha katei ka shnong Balakhwa. Halor katei U Pa’iem, u pynthikna ba ka Hima Nongspung, ka khang ia katei ka jingthmu tih surok jong ka Assam, ha kaba ki la iakhun ha High Court ruh bad ba katei ka kashari, ka la bthah ba dei ban sangeh noh ia katei ka jingtrei ia katei ka surok. Halor katei la iathuh ba U Executive Engineer jong ka tnat PWD na Assam, ula phah ia u kontraktor ban pynsangeh noh ia katei ka jingtrei bad lehse, ka dei na katei ka daw, ba u sa shah ktah kti bein U bah Wajri, ong U Pa’iem. U Pa’iem, u iathuh ruh ba ula kren ia U MLA jong ka thain, U bah Sosthenes Sohtun, na ka bynta ba un iakren bad ki bor pulit bad kumjuh bad u myntri rangbah, halor katei ka jingjia.
Phi don ban ong eiei?