Shillong: Ka Synjuk ki Nong Treikam Lajong (KSNTL), East khasi Hills District, ha ka jingialang kaba long ha ka 7 tarik Jymmang 2019, ha Madanrting, ka la rai ban pynlong ia ka jingialang ha ka 10 tarik Jymmang 2019 ha Shnong Umphyrnai haka iing ba don mar syndah bad ka Kor tylliat Maw jong u bahduh Lyngdoh Nongbri ha ka por 9 baje mynstep bad la kyrpad sha baroh kiba shah ktah ban ia wan khnang khnang sha ka jingialang ban long ha katei ka sngi, ong ka kyrwoh lyngba u Bah Egenstar kurkalang President.
Kane ka synjuk ka kynthup ia ki nongseng karkhana, ki dukan ba pyndonkam da ki kor ki bor ba donkam bording kum kiba trei mashin tylliat maw, shan kali, shna nar stee, shna tiar iing bad kiwei kiwei de ki kam.
Ki la iakren ia ka jingshah ktah jur bad poi ruh sha ka jingduhnong kaba khraw naka daw ka jingpynjari ka tnad MeECL ia ka jingpynduh bording kaba 4 kynta haka shisngi naduh ka por 9 baje mynstep haduh 12 baje shiteng sngi bad bteng biang 7 baje janmeit haduh 8 janmeit man la ka sngi naduh u bnai Lber ba la dep haduh mynta.
Ka kynhun hapoh ka jingialam u president bah Egenstar Kurkalang bad don lang u General Secretary bah B.Lyngdoh Nongbri ha ryngkat ki dkhot lah dep ban iakynduh bad pynsngew ia kane ka jingeh ha u Director MECL (Distribution) haka 24 tarik u Iaiong 2019 ha ophis ha Lumjingshai, Shillong. Hynrei kam don kano kano ka jingpynjynsur lane ka jingpynkylla iaka por kumba ka kynhun ka la kyrpad iaka Sorkar lyngba ka jingiakren bad u Director.
Kane ka la ktah haduh katta katta iaka jingtrei kam jongki karkhana kiba don haka thain Mawblei, Laitkor, Pomlakrai,Mylliemlum ,Smit, Nongkrem, Umphyrnai ter ter shaduh Sohryngkham,Mawryngkneng haduh thain Puriang kumjuh sha ki thain Laitlyngkot bad Laitkroh bad ki bynta ka Upper Shillong.
Ki don kiba shim ram ban seng ia ki kam jongki bad kane ka la ktah jur ia ka kamai kajih jongki.
Phi don ban ong eiei?