“Kata ka ia, ka long hajan!”

AIS Suja

U Ioannis ha ka dew lynnong Patmos ia uba la pynryngkarpar, u la iohi da ka jingpypaw u Blei ha u ia kata ka ia ka por kaba khadduh eh ne ka pateng kaba khadduh eh. U ong- “Kata ka ia, ka long hajan”. Ia ka Kitab Jingpynpaw (Revelation) la thoh da u Ioannis hi ha ki snem 95 A.D. ka long ka Kitab kaba iathuh ia kiei kiei ki ban sa jia noh ha ka pyrthei baroh kawei. Naduh kito ki snem haduh mynta, ngim lah ban ong – “Kata ka ia ka long hajan” namar mynta hi ngi iohi ba ka la wan artad bad ba yn pynurlong ia ki jingiathuhlypa jong kane ka Kitab.
Kumta ngi don ha ka ia kaba khadduh eh, bad ngi long kata ka pateng bynriew ban iohi ia kine kiei kiei ia kiba la thoh ha ka Ktien u Blei, bad ngi don ruh ha ka pateng kaba khadduh eh ha shuwa ba u Jisu un synshar 1000 snem hangne ha pryrthei. Ngi long ka pateng bynriew kaba iohi ia ka jingkhielung u Diengdumbur (Israel) bad ba kata ka Lyiur ne ki por ba jynjar ki wan, bad ngi iohi ia ki tnad ba sei sla (ki ri ka pyrthei) bad da kane ngi tip ba kaba kut ka long hajan. U Diengdumbur (Israel) u la khielung naduh u 1948, mynta ngi ap ba ka lyiur kan wan, ki por ba jynjar tam ha pyrthei baroh kawei kaba ym pat ju jia mynno mynno ruh. Mathaios 24:21 / Mathaios 24:32.
Kata ka Lyiur kan sdang haba ka Israel bad ki Ri Arab kin iateh jutang Jingiasuk (Peace treaty) noh ia ka Temple ba lai ha Jerusalem, bad kane kan jia long noh mynta. Tangba ym pat lah ban tip ia ki por ki bnai ne ki snem. Hynrei ka dak ba paw shai dei tang shu pynieng ia ka Temple ba lai ha Jerusalem. Kine ki dak ki don ha khmat eh mynta ba ki Jiw kin ioh noh ban pynieng (rebuilt) ia ka Temple kaba lai ha Jerusalem.
Kata ka por kam long jngai shuh na ngi mynta ka don ha khmat eh namar ba ka la dei kata ka por ba kan jia, ka jingjop election biang jong u Prime Minister ka Israel u Nethanyahu, kan pynlong ia kata ka por kaba kum kata, bad kane ka jia hapoh ka jingtip bad jingpyniaid u Blei ia kita kiei kiei baroh.
Ka jingiasoi teh kular jingsuk kan jia ynda haba la iasuk, ki Jiw ki dei ban ioh pynieng pat ia ka Temple kaba ki la duh naduh u snem 70 A.D. Bad tang shu pynieng ia ka Temple, kata hi ka mut ba kita ki 69 Taiew kin kut noh bad yn sdang ka 1 taiew ban long 70 taiew katkum u Daniel 9:24-27. Kumta ba yn ioh pyndep noh ia kane ka jingiathuhlypa kaba sah jong ka ktien u Blei.
Ka Gospel u Mathaios ka pynkynmaw ia kaei kaba la ong da u Daniel shaphang kata ka jingijli ba pynduh ba ka da ieng ha ka jaka bakhuid. Mathaios 24:13. Kumta hadien ka jutang Jingiasuk, yn pyniengnoh ia ka Temple ba Lai ha Jerusalem (Israel). Bad ha ka shiteng (3 ½) ka taiew ki Jiw kin ioh ban ai jingknia bad jingainguh bam kumba leh ki kpa tymmen jong ki hyndai. Hynrei ha shiteng (3 ½) kata ka taiew un wan uta u jingijli bapynduh ha kata ka jaka bakhuid (Holy place) ha Jerusalem. Daniel 9:27. Dei hangta kein u leh ialade kum u Blei da kaba un shong hapoh kata ka Temple kaba Lai ia kaba yn sa pynieng (Rebuilt Temple). 1 Thessoloni 2:4.
Dei hangne, bad na kane ka Temple kaba Lai uta u Mrad khlaw (u briew ka pop) un hukum ban buh ia ka dak ha ka kti ka mon lane shyllangmat, kata ka dak ka long 666. Jingpynpaw 13:15-18.
Bad dei ha kata ka por, yn ym don sorkar shuh ha kylleng ki ri ka pyrthei namar un pyllong tang kawei ka sorkar hapoh kita ki por jingsynshar jong u. Bad kan long ka por kaba jynjar sat ka bym pat ju long na myndanglong ka pyrthei bad kan ym long shuh ruh. Mathaios 24:21.
Kumta, kata ka ia ka long hajan Jingpynpaw 22:10.
Na kata ka daw, “To uta u bym hok to un nangleh bymhok. Uta uba tngit to un nang leh tngit. Uta uba hok to un nangleh hok. Uta uba khuid to un nang leh khuid”. Jingpynpaw 22:11.