Byrngem ka US, da ka thma na ka jing ia knieh bor ha Venezuela

U Secretary bar ri jong ka America, U Mike Pompeo, u kren shai mynta ka sngi ba ki shipai ka America, ki lah ban hiar thma ha Venezuela, lada ka don kano kano ka jingdonkam bad katei ka long ban kyrshan ia U Juan Guaido, uba ia khun ban pynhap noh ia U President Nicolas Maduro, uba dei mynta U President jong ka Venezuela.

U Pompeo, u la kren shai mynta ka sngi, ba U President Trump, u shai bha, ba ki shipai ki lah ban shim bynta, lada ka don ka jingdonkam bad katei ka dei kaba ka United States, kan leh.
Kano kano ka jing ia pyni bor jong ka America, kan wan rah ia ka jing ia pyni bor hapdeng ka America bad ka Russia, kaba kyrshan tyngeh ia U President Nicolas Maduro.
Kat haduh mynta ka sngi, la iathuh ba ki don 100ngut ki briew kiba la mynsaw bad u don uwei uba la iap bad la iathuh ba U President Maduro, u don mynta ha ka jingphet rieh ialade, ha kaba u don ha ka Fort Tiuna, ha kaba la pahara ia u, da ki shipai jong ka Cuba.
Kham mynshwa, la iathuh ba U Maduro, ula mut ban mih noh ban leit rieh ialade sha Cuba, hynrei, ka Russia, ka la phah ba un sah beit ha katei ka Ri bad U Pompeo, u kren shai ba ka Russia, kam dei ban tuklar ia katei ka jingjia, namar ba ka dei ka jaka, kaba hap ha ka thain jong ka America.