Ka UDA ka la rit paid, u CEM u tip bha, ong u chairman ka PDA

Shillong: Da ka jingweng kyrshan ki 6 ngut kaba lah ban kiew sha ka 8 ngut, ka United Democratic Alliance (UDA) kaba ialam da u CEM ha KHADC, u bah Teinwel Dkhar, ka la don ha ka jingrit paid ha ka iing kaba don 29 ngut.
La ioh jingtip ba nalor ki 6 ngut kiba la weng ia ka jingkyrshan kynthup ia u bah Mitchel Wankhar, bah Victor Ranee, kong Macdalyne Mawlong kiba dei ki EM, nalor u bah Lambor Malngiang, bah Latiplang Kharkongor bad u bah Gigur Myrthong, sa u bah Pynshngain N Syiem bad u bah Alvin Sawkmie ruh ki lah ban weng noh ka jingkyrshan.
Ha KHADC ka UDA kaba don 19 ngut ki MDC, mynta ka la sah 9 ngut kynthup 7 UDP, 2 HSPDP, 1 NPP.
“U CEM u tip bha ba um don shuh ha ka jingbun paid hadien ba la weng ki 6 ngut ki MDC bad ka shong ha u ban leh”, la ong u bah Lambor.

Ia ka People Democratic Alliance (PDA) la thaw kaba kynthup ki MDC ka NPP bad PDF nalor ki MDC shimet katba ia ka Regional Democratic Alliance (RDA) ka kynthup ia ka UDP bad HSPDP.
Hynrei um pat lah ban ong eiei la kin iathaw EC noh da kaba thymmai ne kin iathaw lang bad ka Congress. “Ngin iashong pyrkhat kaei kaba dei ban leh”, la ong u bah Lambor.
U la ong ba ka jingweng ia ka jingkyrshan na ka UDA kam dei na ka bynta ka jingmyntoi shimet bad u la kyntait ba kan don ka jingktah ia ka shuki chairman ka State Planning Board ha ka jylla. “Ngi iakhih ym ia ka jingmyntoi jong nga shimet hynrei ngi iadon lang ka PDF,NPP”, la ong u chairman ka PDA, u bah Lambor Malngiang.