15 ngut ki shipai kiba iakhun pyrshah ia ki ehrang Maoist ha Gadchiroli ha ryngkat bad u nongniah kali, ki la iap ei mynta ka sngi, haba u bom, uba khlain bor bha, ula bthei ha ka surok bah Dadapur ha Gadchiroli district, Maharashtra.
ka kali kaba la ingkhong, na ka jingbthei kaba la pynbthei da ki ehrang Maoist.
Katei ka jingbthei, ka jia ha ka nohsngi, katba ki shipai ki dang iaid ban khynra ia kitei ki ehrang Maoist bad ha ka por ba ki ar tylli ki kali jong ki shipai, ki dang iaid lyngba ka surok ha Korchi, kaba don kumba 250 Kilometre na Nagpur, ki ehrang Maoist, ki la pynbthei da u bom uba khlain bor bha.
Ki don ruh sa shibun kiwei pat ki shipai kiba mynsaw. La ngeit ba ka jinghiar thma jong ki Maoist mynta ka sngi, ka long hadien ka jingshah siat iap jong ki 40ngut ki Maoist, ha ki shipai, ha ka 22tarik Iaiong jong u snem ba ladep, hajan Bhamragarh ha katei hi ka district.
Kham mynshwa mynta hi ka sngi, la iathuh ba ki ehrang Maoist, ki la thang ia palat lai dorjon ki kali ha Kurkheda, Gadchiroli. Kitei ki kali kiba shah thang, ki dei ki kali jong u kontraktor, kiba trei ia ka surok Purada-Yerkad jong ka surok bah National Highway 136, hajan ka shnong Dadapur.
Phi don ban ong eiei?