|
Da u Bah Philip Marwein
Ka shnong Maweit kam da jngai na Nongstoin. Ka long tang kumba 36 ne 38 kilo metre ei ei na Nongstoin hynrei ka shim por kumba lai kynta lane lai kynta duna ei ei lada leit da ka kali na Nongstoin. Ka daw tynrai jong kane baroh ka dei ka jingsniew palat jong ka surok. Katno ka long kaba sangsot ia baroh ki paidbah kiba leit jingleit da ka kali lyngba jong kane ka surok. Ka jingkordit kaba khraw ka long khamtam ia ki paidbah jong ka thie ka thain Maweit kiba hab ban leit ban wan manla ka por na kane ka surok. Dang shen kane ka jingkordit ka la paw biang ha ki kotkhubor. Dei ka Hynniewtrep Youth Council (HYC) kaba la iakhih bad pynkhih paidbah dang shen halor kane ka jingeh ka jong ki paidbah ba sniew palat kane ka surok. Ym lah shuh ban batai ia ka jingeh ba ki paidbah ki iakynduh na ka daw jong ka jingsniew palat jong kane ka surok, khamtam kiba pang ba shitom, kiba armet bad wat ki tymmen ki kro ruh ki shem jingeh shibun.
Ki nongshongshnong kiba kham suhsat palat manla ka por na ka daw jong ka jingsniew jong kane ka surok ki dei ka Nonglanglieh, Nongkhusba, Nongshyrkon, Kujenrong, Nongiyiar, Nongpein, Mawrynniaw, Mawlieh, Miangkain, Nongdkhar, Kamino, Nonglamjew, Mawmarin, Sdaddkhar, Porkhadoh, Maweit, Nongpathar, Miangshang, Nongsba, Mawdom, Mawdon, Wahlyngdoh, Nongtraw, Mawlait, Risiang, Umthli bad wat ki paidbah na thain Nongstoin ruh ki iakynduh shibun ki jingeh khamtam ki Nongiew Nonghat. Ki nongshongshnong kiba na kiwei ki jaka kim tip satia ia ka jingjynjar jong ki paidbah kiba sah ha ka thain Maweit. Ki hab ban leit6 sha Maweit ban mad ia ka jingeh jong ki. La kyntu ia ki bym dei na kane ka thain ban leit mad lem ia kane ka jingeh bad kin sa tip ka mut aiu ban iaid lyngba na kane ka surok.
Ka jingthmu jong ki nongialam bad jong ka sorkar ka long ban pyndep noh ia ka surok na Nongstoin-Maweit-Kulang-Nongjri khnang ban iakynduh bad ka surok na Ranikor-Nonghyllam-Nongumsur-Nongjri Khonjoy-Moheskola ha Nongjri. Katkum ka jingkhein antad ka jingjngai jong ka surok na Nongstoin-Maweit-Kulang-Nongjri ka long kumba 75 kilo metre. Ynda la dep pyntrei ia kane ka surok kan long ka jingkyrkhu ia ki paidbah jong ka West bad South West Khasi Hills baroh kawei. Ha ka jingshisha ka don ka jingmut na ka liang ka sorkar ba ia kane ka surok dei ban pynkylla sha ka surok ar lain (two lane road). Ia kane ka surok la khot ka Nongstoin-Nongpyndeng-Maweit-Nongjri road. Kane ka surok ka sdang na Nongstoin bad ka iaid lyngba ka Nongpyndeng, Nongsba, Risiang, Mawlait, Nongtraw, Wahlyngdoh, Mawdom, Miangshang, Nongpathar, Maweit, Mawmarin, Porkhadoh, Sdaddkhar, Kulang, Nongjri bad nangta kan poi sha Kohnjoy bad Moheskola khap-pud bad ka Moheskola -Mahadew jong ka South Garo Hills. Jin da la dep pyntrei bha ia kane ka surok ka jingkyrkhu kaba khraw kan wan sha ka thie ka thain bad ka thain jong ka Khasi sepngi baroh kawei.
Kum ka jingpynkynmaw bad khnang ban iatip shai ia ka nongrim kaba naduh mynshuwa, ha ka por jong ka sorkar Assam, la pyrshang ban tih surok na Nongstoin ban sam lyngba jong ka Ri Lyngngam shaduh Garo Hills. Kumta la sdang nyngkong ia ka surok Nongstoin ban poi sha Darugiri (Garo Hills) via Nongshyrkon. Ka jingthmu jong kane ka surok barim ka long ban sdang na Nongstoin-Nongpyndeng-Umthli-Nongtraw, Wahlyngdoh, Rimyniar-Nongdohlieh-Porla-Nongshyrkon-Nongriangna-Waitwiang-Miangmawdar-Nongharum-Nongrathaw-Dorengre-Songsak-Shahlang-Suwangre-Nongshram-Rongjeng haduh Darugiri ha Garo Hills. Hynrei kane ka surok kam shym la long kam namarba la iakynduh shibun ki jingeh. Kawei na kita ki jingeh ka long ba ka sorkar kam shym la dap peisa ban tei ia kane ka surok bad khamtam, ka bun eh ka jinglut ban shna jingkieng ha Wah Rwiang bad Wah Blei, nalor kiwei kiwei ki wah kiba rit. Ia kane ka surok la sdang ban shna ia kita ki snem 1961-61 haduh 1964-65 hynrei la sangeh noh. Hadien ka la wan noh ka Meghalaya, kumta la klet noh ia kane ka surok bad ka sdang noh ia ka surok na Riangdo sha Rongjeng via Umdang bad Nongdaju bad kane ka la long kam da shisha. Kane ka surok mynta ka la kylla long ka surok ar lain.
Ka la jia aiu ia ka surok na Nongstoin sha Maweit pat? Ia kane ka surok la bteng ban tei da ka PWD hapoh ka sorkar Meghalaya hynrei ka jingpyntrei ka long tang malu mala bad kam da khein kongsan ei ei haduh ba tang 38 kilo metre ruh ka la shim por da ki phew phew snem. Haduh mynta ruh kane ka surok ka dang sniew haduh katta katta. Ka jingbymsalia ia kane ka surok ka dei naduh ka por ba long MLA jong u Bah Hopingstone, hadien la wan long MLA u Bah Endro Iawphniaw, hadien la wan long MLA biang u Bah Hopingstone, hadien kata la wan long MLA u Bah Witting Mawsor bad mynta la wan long MLA u Bah Gigur Myrthong. Na ka liang ki MLA bad MDC ruh, naduh mynshuwa, kim shim khia ei ei na ka bynta ban pynbha noh ia kane ka surok.
|
Phi don ban ong eiei?