Ha ka 29 tarik ngin ia kren beit ia ka ILP: Daniel

Shillong,20 Iaiong:
Ki nongialam ki 13 sengbhalang ki la pyntip ba ki la ioh pdiang ia ka shithi khot ia kren ka sorkar, kaba la khot ban ia kren ha ka 29 tarik mynta u bnai ban ia kren halor ki ain ban khanglad ia ka jingwan rung kyrthep u mynder sha kane ka jylla. “Ngi la ioh pdiang ia ka shithi khot ia kren na ka sorkar jylla kaba la khot ia ki sengbhalang ha ka 29 tarik mynta u bnai , ngin leit sha katei ka jingialang da ka jingmut ban pynbor ia ka sorkar ban pyntreikam da ka ILP” ong u President ka KSU u samla Daniel Khyriem ha ka sngi saitjain.
U la ong ruh ba ha katei ka jingiakren ki sengbhalang kin sei ia ki mat ba donkam ban pyni ba donkam ban pyntreikam beit da ka ILP, u President ka KSU u la ong ba katkum ka Section 214 jong ka Eastern Bengal Frontier Regulation, 1873 la pyni shai ba ka sorkar ka lah ban thaw da ki ain lajong ban peit katkum ka jinglong jingman ka jylla.
”Ngi kwah ia ka ain kaba lah ban iada kyrpang ia ka jaitbynriew rit paid lajong” ong u bah Daniel uba la ong ruh ba ka sorkar ka donkam ban pyntreikam noh khlem pynslem ia ka ILP katba ka por ka dang biang.