Ka mynsiem tan tyllai, kynthoh,wohkjat ia kiwei kim dei ban ioh jaka

Ka jingkiew shaphrang jong  ka imlang sahlang bad ka jylla ha baroh ki liang ka shong ha ka jingiasngewthuh jingmut bad iatreilang hapdeng kiba bun balang  ban pyntyllun ia ki kam kiba ia dei bad ka bha ka miat ki nongshong shnong. Ka  jingkwah burom , ka jingkynthoh ban pynbudnam , ka jingpynksan tang ia ka nia la jong khlem da sngap  ia ka jingai jingmut lang kiwei  bad ka jingpyrshang ban wanrah  ia ka jingiapher  sain pyrthei ki ban pynjot,  pyntroin ia ka jingiatylli  bad jinglong kawei kim dei ban ioh jaka. Ka jingpyndem markylliang bad ki jingkynthoh ki ban iatei na bynta ka jingmyntoi bad jingbha kiba bun balang ki long kiba donkam .                                Ki jinglong ban kynthoh ia kiwei kiba  shimkhia  ban kyntiew ia ka imlang sahlang ha kano kano ka liang  la shem ba bunsien ki dei tang ka jinglong kynriang ne kyllain namar ialade kim treh ban mih shakhmat,  da leh kiwei  pat pynbudnam laiphew jait ban tan tyllai kaba long thik kum kito ki jingthaw kiba ialade kim bam, ia kiwei ruh kim ai.   Bunsien ki jingiapait iapra bad iapher jingmut ha ki kynhun ne seng bapher bapher bad ha  ka imlang sahlang  ki mih ki dei namar ka jingkwah burom, ka jingbymdon ka mynsiem pyndem markylliang bad khwan myntoi shimet . Ngi ju sakhi ba lada kiwei ki  shim ia ka bynta ban ialam ban kyntiew ia ka bha ka miat ki paidbah,  ki don kiwei pat na sha lyndet ki ban kynthoh, ban wad daw, ban pynjah burom,  ban wohkjat  bad pynbudnam khnang ban ialam bakla ia kiba bun balang bad  shim kabu pat halor kata.                                                                                                              Don bun ki khep kiba pynduh jingkyrmen bad duh  mynsiem  ia kito kiba ju  trei na bynta ka jingmyntoi  ka imlang sahlang namar kitei ki daw, ai ba  kane  ka khubor kan ai mynsiem ia ki  ban nangiaitrei  khlem kynran dien  ban kyntiew ia ka bha ka miat kiba bun balang kum ha ki kam ialehkai, ka pule puthi, ki kam pynroi, ban rat dyngkhong ia ki jingsniew bad ishu  kiba ktah ia ki khun samla, ia ka imlang sahlang, ia lawei ka jaidbynriew  bad jylla  ban nym pynsngew ne pynsngap ia ki jingkynthoh ne jingpynbudnam da ki riew sahdien ha ka pyrkhat pyrdain khlem da don nongrim hynrei  ban don ia ka jingkut jingmut kaba skhem ban poi sha ka thong  ba kan long ka jubab ia ki riew pynbudnam bad kwah burom da ki kam.