I.L.P Vs Tourists

 I. L. P (inner line permit) Vs Tourist, ka jingmut ka long, “Kumno ka Ain ILP ka ia pyrshah bad ka kam Shangkai pyrthei.?
Ha ka Pyrthei jingieit Ri bad Jaidbynriew, ngi ia kynduh shibun ki jingthrang mynsiem kumno ban wad ki lad ki lynti ban tynrong iaka khia ka shon khamtam na ki umsaw, ki jingeh ba ka jaidbynriew ka ioh jingshem.
Hoid lada iathir iatai, iaka lawei jongka Jaidbynriew, ngi Shem ba katno ka pynlynga, pynpisa mynsiem ia uwei pa uwei u khun jongka Jaidbynriew khasi khara……..”Ngi dom, ngi dukhi,!!!….. Ka shoh ka sympat iaka dohnud,ka tyrha,ka Sat sia….. ” Kumta, ngi shim bad ngi rai dakaba ngi pdiang ba ka long kaba bhatam khamtam haki pateng hadien habud!!!
Ki riew ieid Ri ki Shim iaka sienjam kaba tyngeh, dakaba wanrah ka “Issue” bad pyni, pynpaw hakhmat u paidbah ba ka Ain ILP, kadei ka bniat kaba khlain bor tam ban iada, ban phikir, ban pynneh pynsah iaka Jaidbynriew nakita ki jingtyllep umsaw.Kane ka bniat ba khlainbor, ka dei kaba la wanrah naduh ka sorkar phareng(British ruler in India) hakito ki por ba la leit,dakaba shim naka Ain”Bengal Eastern Frontier Regulation 1873″.Lada, ha kum mynta ki por yn pyntreikam pura iakane ka Ain hapoh ka jylla jongngi, kaei tharai ka jubab kan ai ha uwei pa uwei u nongshongshnong.Kane ka ain shisha ka long kaba khor, bad kaba khlainbor shikatdei.Bad Ka jingmih (effect) Kan long kaba pynsngap jar jar ia ka rukom jinglong u khasi khara mynta (Situation).
Ngi shem don arbynta, ki nongshong shnong, kiba pyrshah bad kyrshan iakane ka Ain ILP ban pyntreikam hapoh ka jylla Meghalaya jongngi. Hoid, kane ka Ain kan ktah jur iaka jingwanboi ki tourists Sha ka jylla jongngi,namar kadon ka jingiapher shibun, lada iaid haka Jinglaitluid bad iaid haka jingshahteh shahkhum.
Ngi ju lap,lada ka lynti ka long kaba laitluid kam eh ia ngi ban rai ba ngin iaid kai noh nakato ka lynti, Hynrei lada ka lynti ka khim bad ka pyrkhing, ngi sngewsalia noh ban jied, bad ngim lah ban shimrai khuk khak. Nakata ka daw, ka iapher ka laitluid bad ka pyrkhing.
Ha ka jingtyllun bur shi bur jongka por, ngi shem ba jan baroh hi ha poh ri india, ngi don haka jingeh ban iohkam iohjam.Wat hapoh ka jylla jongngi, ngi la jan kyllut shaphang kata ka kyrduh kam kyrduh jam.Kumta ,shisha kane ka long ka jingdawa ba nyngkong eh haka longbriew manbriew.Ka sorkar ruh ka imat kamlah shuh ban ialeh kumno ban pyndap pynbiang iaka jingdonkam u nongshong shnong,kumta kam imon eh ba kum kita ki Ain kiba teh kin ktah kylla iaka jingim u nongshong shnong.Namarkata,Ngi shem ba ka sorkar ka kren, “Ngin wad ki lad ki lynti ban thaw ki Ain kiba iadei kum kane ka juk bad ka jinglong jongka”Kiba iasyriem kum ka ILP, hynrei kam dei pat baroh shirynieng kata ka Ain ka dei ka ILP. Shi rukom, lehse kata ka dei eh,nakabynta ka jingbha lang baroh.
Hoid, ngim lah ban len ruh, ka iew tourist hapoh ka jylla jongngi, ka ilong iman kumba ka nangkiewirat katba nangmih ki sngi. Khamtam haba ngi shem wat sha ki shnong nongkyndong ruh ka pynkhih jur.Kiba bun wat ha nongkyndong, ki la ithuh pura ba kane ka iew tourists, ka long kawei pat ka jingkhang ba plie jingkyrmen iaka mynsiem ba tlor.Lada ia thir, bun ki shnong nongkyndong mynta kim im shuh iaka jingim kumba mynshwa, hakaba ka rep ka riang kadei ka jingim ba kongsan jongki hynrei kumba ka paw mynta ka jingim nongkyndong ka la iakhleh. Mynta ngim lah ban len ki ba bun ha nongkyndong ruh kiba la stad la nang suda.
Namarkata, kato ka jingim haka rep ka riang kam lah ban kyntiew ne pynbor iaki de ban leit phai biang shaka, na kiba bun ki daw kiba shongnia. Namar kumba ngi tip bun ki rukom rep ki la nanghiar,haki nongkyndong khamtam iakito ki mar rep bym shym la ithuh da ka sorkar!!!
Ka jingwanpoi ka iew tourist, haki nongkyndong, la shem kumba ka iadei dur bad kaei kaba ki thmu ki thrang, Shibun ki samla bala nang la stad ki shong haki shnong ki thaw la jong,Ka long pynban kum ka lad ba khraw tam ba kin ioh ban trei, ha ryngkat ka jingsngewieid iaka kam ban trei. Kane ka long ka jingkyrkhu ka ba khraw, Kaba lah ban pyndap Ia ka Jingim ba diaw ba thylli jongKi.
Na kitei ki jingkdew ha neng, ka long kaba donkam ban iathir iatai sani, bad shim iaka jingiasngewthuh jingmut lang, kaba kumno ngin Jied bad ngin rai, naka bynta ka jingbit jingbiang lang kum ki nongshong shnong.
Ha ka jingsngewthuh jongnga, Ki bun ki lad kiba ngim dei ban iehnoh ne ban shu ia niom shilliang.
Toi, lada kam dei ka Ain ILP ruh, tangba kata ka Ain kan dei kaba don bniat ban khanglad ia kibynta ba jyrwit jyrwat kiba iasoh bad ka jinglong shngain, bad ka jinglong rit paid jongka jaidbynriew jongngi.
Ha ka jingshisha, Ki sengbhalang hadien ba la ialeh tyngeh ban wanrah iaka Ain ILP, haki por bala dep, Ngi kynmaw kumno ki mynjur iakata ka “Modified ILP” dakaba pynkut iabaroh ki jingiakhih. Ym lah ban sngewthuh pat, kumno mynta ki mih biang, Ki jingdawa ILP! Hoid, ym lah ban kynthoh kumno kumno,hala ka jong ka  jong ka Jingsngew, bad ka jingtreikam jong ki sengbhalang,Ki don ka hok ban dawa ban pynsngew, Hynrei,Ka jingkyntu ka long kaei kaba ka sorkar ka la mynjur bad la dep iateh,la dei ban khmih bniah ba kata ka jingiakut kan dei kaba khlainbor, ym kaba shu iap ei.
Namar bunsien ka Shiphang da kumne Bad ka Shiphang da kumto, Ka pynngiah bad pynjlep ia uba bun balang, Khatduh kin mih tang ki jingiakynthoh bad ia kawang ktieh uwei ia uwei. Bad ka jingshaniah na u paidbah ruh, kan wai noh shisien ka sngi.
Ha kaba pynkut, naba kumta ka jingdawa jongka por, ka jam shi iai jam, ym don uwei ruh ban kylla dien trai, ngi iabeh kein sha kata ka jingkylla, kaba ngi khmih ba kan long kaba bit ba biang khlem da Shah niewshilliang.  Khublei shibun
N:B- U nongthoh u pdiang iaka jingkynthoh ne iaka jingmut, katkum ka hok uwei pa uwei ban pynsngew.
Shri. Dap B. Syngkrem
[email protected]