Ka jingmane Blei kaba shisha

Ex. Rev. K. Langrin

 

 

Ngi ju lap ba ha ki jingiaseng jong ki Khristan ha kine ki sngi ki Nongmane Blei ki ia mane ia ki Phadar, ki Pastor bad ki nongialam ym ia u Blei. Hato phi tip balei ia u Abraham la khot u Kpa jong ka jingngeit ne Father of Faith? La khot ia u Abraham kum u Kpa jong ka jingngeit namar ka jingngeit jong u ka long kaba khraw katta katta bad ba ka jingmane Blei jong u ka long kaba shisha ym kum ka jong ngi. Baroh ngi tip ia u Abraham u don u khun ba la khot Isaak ba la kha na ka Sara ha ka por ba la tymmen bha. Ynda u Isaak u la sdang samla, u Blei u la kwah ban tynjuh ia ka jingngeit jong u Abraham bad ban iohi ia ka jingmane Blei jong u da kaba u la pan na u Abraham ban knia ainguh ia u Isaak ha ka duwan. Ha ki dkhot 2 bad 3 u Blei u la ong, To shim noh mynta ia la u khun, u khun marwei jong me, u Isaak, ia uba me ieit eh, to khie leit ruh sha ki lum Moraiah, to knia ia u hangta kum ka jingianguh thang halor uwei na kita ki lum ia uba ngan iathuh ha me. Te u Abraham u la khie dangstep eh, bad u la teh ia ka jin halor ka kadda jong u, bad u la shim lem bad u ia ki arngut ki samla jong u, bad ia u Isaak u Khun jong u…
Ka jingiaid lynti ka long kaba jrong eh. Ha ka sngi kaba lai u Abraham u la iohi ia uta u lum ba u Blei u la iathuh. U Abraham haba u la iohi ia uta u lum uba long ka jaka ban knia ia u Isaak, u la hukum ia kita ki arngut ki samla ba kin nangshong hangta. Ha ka dkhot 5, u Abraham u la ong ha kita ki samla jong u, to sah noh ma phi shane lem bad ka kadda, te ma nga lem bad une u samla ngin ialeit shaduh shatai bad ngin ia mane; hadien kata ngin ia wan kylla pat sha phi. Katba kita ki arngut ki samla ki nang iashong hangta, u Abraham lem bad u Isaak, tang arngut ki la ialeit kiew ia uta u lum. U Abraham u la bat ia ka tari ha ka kti, katba u Isaak pat u kit ia ki dieng ban thang. Ynda la poi ha kata ka jaka ba la ong da u Blei, u Abraham bad u Isaak ki la tei ia ka duwan da kita ki dieng. Mar ia dep, u Abraham kum u briew uba la iap ha ka jingieit ia la u khun marwei, u la khum ia u Isaak, u la buh ha ka duwan bad u la shim ia ka tari ha ka kti ban dung iap ia la u khun. Katba u Abraham u dang pynkhreh ia kita kiei kiei baroh, u Blei u dang peit ia u. Bad hangta u Blei u la iohi ia ka jingngeit bad jingmane Blei kaba shisha shisha jong u Abraham. Kumta u angel u Trai na bneng u la ong, ko Abraham, to wat buh ia la ka kti ha uta u samla, lymne wat leh ei ei ruh em ia u……. U Abraham u la khmied ia la ki khmat, bad haba u la peit shadien jong u, u la iohi ia u khunlangbrot ba la suhsat ki reng, ba la pynkhreh da u Blei ban knia ha ka jaka jong u Isaak. Te u Abraham u la loit noh ia kita ki jingkhum jingteh ia u Isaak, nangta u la shim ia uta u langbrot ba la pynkhreh da u Blei hi bad u Abraham u la knia ha ka jaka jong u Isaak. Te ynda la dep knia baroh arngut ki la leit phai ban iakynduh ia kita ki arngut ki samla khlem mynsaw. Halor kane ka jingjia ngi ioh ia ka jinghikai shaphang ka jingmane Blei kaba shisha ne true worship.
Halor kane ka jingjia, don tang khyndiat eh kiba sngewthuh bad tang khyndiat eh kiba tip ia ka jingmane Blei kaba shisha. Bun bah ki Khristan ki ialeit sha iingmane pynban kim ju mane ia u Blei. Ha iingmane ki iarwai jam ia ki sur kiba bang, ki duwai jam, ki sngap ia ki nongiathuh khana, ki ai jingainguh, pynban kim ju mane ia u Blei. Kiba bun ki Khristan ha kine ki sngi shwa ba kin leit sha jingiaseng, ki ju kylli – Mano ban iathuhkhana? Bad ynda la wai jingiaseng, katto katne ki bein ia u nongiathuhkhana bad katto katne pat ki iaroh. Bun ki iaroh ia u nongiathuhkhana uba stad bad ki klet ban iaroh ia u Blei. Kumta ha ka jaka ban leit mane ia u Blei ki leit mane pynban ia u nongiathuhkhana. Don ruh napdeng ki nongiathuhkhana kiba ju sngewtynnad ban kawang ktieh iano iano ha ka jaka ban ai jingiasyllok ia ki paidbah. Napdeng ki nongsngap ruh ki sngewtynnad eh ia u nongiathuhkhana uba nang ban thaw da ka khlieh, hynrei ia uta uba kren beit na ka ktien u Blei ki ong- Ngi la ngiah ban sngap namar kata ka la rim eh.
Balei ki Khristan kiba leit jingiaseng ki leh pop ynda la mih na iingmane? Ka daw ka long ba ki pyrkhat ba u Blei u don tang ha iingmane. Bad haba u Chairman u ong, to ngin ia pynwai noh ia ka jingiaseng, ki paidbah ki pyrkhat ba la wai ka jingmane Blei. Kumta ynda la mih na iingmane ki sdang sa ban ia lorni, bishni bad saindur ban leh ia ki bun jait ki pop pyrshah ia ki para briew namar ki pyrkhat ba u Blei u don tang ha iingmane. Ki briew mynta ki long kum kato ka kynthei Nongsamaria kaba iakren bad u Jisu (Ioan 4:20) “Ki Kpa jong ngi ki ia mane Blei halor une u lum”. Hynrei u Jisu u ong ia ka (Ioan 4:20) “Ki nongmane Blei kiba shisha kin ia mane ha ka mynsiem bad ha kaba shisha. Kumta ka long kaba bakla ban pyrkhat ba u Blei u don tang ha iingmane bad ba ka jingmane Blei ka long tang ha iingmane. Ka jingleit sha ki jingiaseng bah ka long tang ka jingiakynduh paralok bad ban pyni riam thymmai bad ban pynsngewbha ia ki Phadar, ki Pastor, ki Tymmenbasan bad ki nongialap. Ka long kaba bakla ba kiba leit sha iingmane kin shu peitkai ia u chairman, ia u nongpule bad duwai, ia ki nongrwai choir bad ia u nongiathuhkhana. Naba ka jingmane Blei kaba shisha ka long ba ngi long ki nongmane bad u Blei pat u nong peit ia ngi. U Blei u sngewtynnad katta katta lada ngi mane ia u da ka mynsiem kaba shisha watla ngi don ha kamra tang marwei ne arngut.
Ka ktien Mane (Worship) ha ka Bible ka paw nyngkong eh ha (Jen 22:5) kumno ba ka jingmane jong u Abraham ka long ka jingmane kaba shisha ia u Blei, ba u Blei u da sngewtynnad katta katta bad ba u sa ai nam ia u Abraham U Kpa Jong ka Jingngeit (Father of Faith). Ia ka jingmane Blei kaba shisha la pynshong nongrim kumne:-
(1)Lyngba ka Jingpynpaw u Blei:- Ia ka jingmane Blei kaba shisha ym shym la pynshong nongrim na kata ka jingsngewtynnad ia u nongiathuhkhana, ne ia ki nongrwai ne jingput jingtem. Hynrei ia ka jingmane Blei kaba shisha la pynshong nongrim na ka jingpynpaw u Blei. Hangno u Blei u pynpaw ia ki Khristan mynta? Ha ka Bible kaba long ka ktien jong U. Namarkata, ka jingmane Blei kaba shisha ka dei kata kaba ka jingiathuhkhana ka long katkum na ka Bible, ki jingrwai ki long katkum ka Bible bad ki jingdwai kin long katkum ki jinghikai jong u Jisu. Lada bakla ia kane ngi la bakla ha ka jingmane Blei.
(2)Lyngba ka jingpynkhreh:- Ia ka jingmane Blei kaba shisha ym shym la pynshong nongrim na ka jingleh kyrkieh ne kaba shu leh tang dep khlem da pynkhreh. Ha ka dkhot -3, u Abraham haba u la ioh ia ka jingpynpaw u Blei, watla ka long kaba eh sat ia u ban pdiang, pynban u la pynkhreh ban pdiang. Ka jingpynkhreh jong u Abraham ka long ba ka u la khot ia ki arngut ki shakri jong u ban ialeit lang, ki diengiap ban thang, u la teh jin ia ka kadda bad u la ialam ia la u khun. Te kumno pat ba ma ngi ngi ngin pynkhreh haba leit sha ki jingiaseng ne jingmane Blei. Ka long ba kita kiba dei ban iathuhkhana to kin da pynkhreh bha, kita kiba rwai to kin da pynkhreh bha, kita kiba duwai to kin da pynkhreh bha, kita kiba sngap to kin da pynkhreh bha ban ai jaka ia ka ktien u Blei. Lada ngim pynkhreh ka jingmane Blei jong ngi ka long kaba thala.
(3)Lyngba ka jingpyniakhlad bad ka pyrthei:- Ha ki dkhot -4,5, la iathuh ba u Abraham ha shuwa ba ma u bad u Isaak kin leit kiew sha u lum ban mane Blei, u la pyniakhlad bad iehnoh noh ia ki arngut ki shakri jong u. Balei ba u Abraham um shah ia kita ki shakri ban ialeit lang sha uta u lum? Namarba u tip ba lada kin ialeit lang, kin long ki nongpynwit ia u ban knia ia u Isaak. Ha ka jingmane Blei kaba shisha, lada don ba pynwit, kata ka jingmane kam long shuh kaba shisha. Ka jingmane Blei kaba shisha ka dei ban long laitluid khlem jingpynwit mano mano ruh.
(4)Ka Jingaiti lut:- Ha ki dkhot 6-10 la iathuh ba u Abraham u la aiti lut ia la u khun ba la kha marwei sha u Blei. U Abraham u la long kum u briew uba la iap katba u dang rah ia la ka kti bad ka tari ban dung iap ia la u khun namarba u la aiti lut sha u Blei. Ka jingmane Blei kaba shisha ka long kaba rem dor katta katta ba ym lah ban thied da ka spah. Khnang ba ngin ioh ia ka jingmane Blei kaba shisha ngi dei ban long kita kiba la iap ha ka jingkwah brai ka pyrthei bad kiba la aiti lut kum ki nongialehkai phutbol haba ki don ha madan. U Blei u kwah ia ngi ba ngin aiti sha u 100% ym tang 50%. Kata ka mut ki nongiathuhkhana ki dei ban pynkhreh 100% bad ki nongsngap ruh kin sngap 100%.
(5)Ka jingpynbna:- Hadien ba u Abraham u la iohsngew ia ka ktien na bneng ban yn pyniap ia u Isaak bad ba u la leit shim ia u langbrot ban knia ha duwan, u la pynbna ia kata ka jaka “Jehobah-Jireh” lane kaba u Trai hi un ai. Da kaba un leh kumta u la pynbna ia u Blei bad ki jinglehbha jong u. Hangne u Abraham u la pynbna ba u Blei u long uei bad kiei kiei ki jingleh jong u. Ia kata ka jingmane jong u Abraham u la khot “Praise and Worship” lane ka jingiaroh bad jingmane. “Praise is Proclaiming what God has done and worship is proclaiming who God is”. Hangne ngi sngewthuh ba ngi iaroh ia u Blei namarba u la leh bha ia ngi, ba u long uba donbor bad uba khrawtam. Kumta dei ia u Blei ba ngi dei hok bad ia ka jingiaroh ha ka jingmane Blei, hynrei ym ban iaroh ia u nongiathuhkhana. Ngi mane ne worship ia u Blei namar ba ngim lah ban ialeh pyrshah ia u lano lano ruh. Ha ka jingmane Blei to ngin pynbna ia ki jingleh bha jong u bad ba u long uba donbor halor baroh ……. Haleluiah.
Q. kiei ki jingmih na ka jingmane Blei kaba shisha?
(1) Ban pynioh pat ia kaba la duh noh:- Ha ki dkhot 11, 12 u Blei haha u la iohi ia ka jingmane kaba shisha jong u Abraham, u la ai pat ha u Abraham ia u Isaak khlem kano kano ka jingmynsaw. U Abraham ha ka jaka ba un duh noh ia la u khun baieit, mynta u la ioh pat. U Jisu u la aibor ia ki Apostol ban leit ialap bad ban leh kambah bad ki la lah shisha. Uta u Domdoi na ka shnong Umyiap mynshuwa ruh u la ioh ia ka bor ban pyntyllun ia u maw da ka jingdwai. Hynrei ma ngi mynta ngim donbor shuh ban leh wat tang iwei i kam phylla. Ka daw ka long namar ka jingmane Blei jong ngi ka la long kaba thala thalein. Hato ngim kwah seh mo ban iohi pat ia kaba la duh?
(2) Ka jingpynskhem:- Hadien jong ka jingmane Blei kaba shisha jong u Abraham, u Blei u la pynskhem ia ka jingiateh jutang bad u, ba un kyrkhu ia u Abraham bad ia u symbai jong u kat ki khlur ka sahit bneng. Kan long kumjuh ia ngi lada ka jingmane jong ngi ka long kaba shisha, u Blei un pynskhem ia ka jingiateh jutang bad ngi, ba ngin ioh pat ia ka bor ba ngi la duh bad ba ngin ioh ban leit sha bneng.
Ban pynkut ia kane ka khubor ngan pynkynmaw ia ka jinghikai jong u Jisu shaphang ki arngut ki nongmane Blei (Lk 18:9-14) – u pharisi bad u nongkhrong kiba la ialeit lang sha ka Temple ban duwai. Uta u pharisi u la duwai kumne, “Ah Blei nga nguh ia Me ba ngam long kum kiwei ki briew kiba shim da ka bor, ki bym hok, kiba klim, lane kum une u nongkhrong”. Nangta u la nang niew ter ter ia ki kam ba bha lajong, “Nga shah jingit arsien shi taiew, nga ai kaba shiphew na kiei kiei baroh katba nga don”. Uta u nongkhrong pat um nud wat tang ban khmied ia la ki khmat namar ba ki briew ki peit ibein ia u, u da thap ia la ka shadem bad u la duwai, “Ah u Blei to isynei ia nga uba pop”. U Jisu u ong ba u pharisi u la leit phai khlem ioh ei ei katba u nongkhrong pat u la ioh ia ka jingpynksan. Kiba bun na ki nongmane Blei ha kine ki sngi ki long kum u pharisi kiba leit sha iingmane da ka jingsarong bad jingibein ia kiwei ia kiba u Blei um sngewtynnad ban iohi bad ban peit. To ai ba kane ka khubor ba nga la thoh sha phi kan long ka jingkyrsiew thiah ba phin kyndit bynriew noh da kaba pynthymmai noh ia ka jingmane Blei khnang ba ngin ioh pat ia ka bor bad ba u Blei un sngewbha pat ia ngi. Amen.