New Delhi: Ha kane ka elekshon Lok Sabbha 2019, ki don haduh 80ngut ki kandidet, kiba lum pisa online, na kito kiba sngew dei, na ka bynta ban pan jingiarap, ba kin iakhun ia ka elekshon. Kitei ki lum pisa lyngba kawei ka seng, kaba kyrteng Our democracy.in, kaba la seng da U Anand Mangnale, ha ryngkat bad u nongthoh khubor ba rim, Bilal Zaidi.
U Kanhaiya Kumar
U Zaidi, u iathuh ba ka rukom siew, ka dei tang na ka bynta kito kiba don account ha India bad ki lah ban siew pisa sha katei ka seng.
Na ki 80ngut ki kandidet, kiba lum pisa, ki don 78ngut ki nongialam kiba kyrshan bad iarap ban lum pisa lem ia kitei ki kandidet bad la iathuh ba haduh ka 23tarik Iaiong 2019, ki la lah ban pynmih pisa T.1.6klur, ha kaba la bei pisa da ki 8934ngut ki briew bad na kitei kiba ialeh elekshon, ki kynthup ia 51ngut kiba iakhun na ki tiket jong ki seng, katba 27ngut kiba iakhun kum ki kyrtong shimet.
Ka jingpoi ka pisa haduh mynta, la iathuh ba ki kandidet shimet, ki ioh lum tang T.4.65lak, katba kaba tam nangtei, kaba long T.1.59klur, ka lei sha ki 51 ngut kiba iakhun na ki parti bad la iathuh ba u kandidet jong ka seng CPI, U Kanhaiya Kumar, ula ioh lum haduh T.70lak bad kaba dei ruh ka jingioh lum pisa kaba bun tam na kitei ki kandidet haneng.
Ki don 18ngut ki kandidet na ka seng Communist Party of India (CPI) bad ka Communist Party of India – Marxist (CPM), kiba lum pisa ialade na katei ka online, katba ka seng Aam Admi Party (AAP) and Bahujan Samajwadi Party (BSP) ki don mar san ngut ki kandidet. Nangta sa ka Congress, ka don 2ngut ki kandidet kiba lum pisa online bad uwei na kitei u dei U Nana Patole, uba ialeh pyrshah ia U Nitin Gadkari, uba ia khun na Nagpur bad utei ula ioh lum pisa haduh T.81,750. U Dr Ashok Tanwar, uwei pat u kandidet jong ka seng Congress, u dei uba ialeh na Sirsa constituency bad utei ula ioh lum pisa T.2,300.
Na shibun kiwei, U Tej Bahadur Yadav, uba dei u shipai BSF, uba la shah beh kam, namar ba u ujor ia ka jingsniew ka bam kaba la ai ia ki shipai ha ka kam, ula ioh lum T.16,751 bad utei u iakhun pyrshah ia U Narendra Modi myntri rangbahduh na Varanasi.
Phi don ban ong eiei?