Mynta yn iaid kjat bad shah thngan ka HYC na Maweit shaduh Nongstoiñ

Nongstoiñ: Kum shi bynta ban pynbor ia ka sorkar ba kan pyndep noh ia ki jingkular ban pynioh noh ia ka surok ar lain na Nongstoiñ sha Maweit bad na Maweit sha Kulang bad Nongjri kaba don 75 KM, kaba khlem pat paw dak satia haduh mynta na ka liang jong ka Seng HYC Maweit circle kala shim ia ka rai ba mynta ka sngi kan iaid kjat shah thngan na Maweit shaduh Nongstoiñ.

Katkum ka kyrwoh na u President ka Seng u samla Jerimaia Dkhar u la ong ba Seng ka pang ka mynsiem bad kam suk ban shu shong kli kti ha dpei khlem da pynpaw sha ka pyrthei ia kane ka jingiehnoh bein ka sorkar Meghalaya ia ka dong ka thaiñ ha ki liang baroh kumta da ka jingiaid kjat shah thngan syndon lashai naduh Maweit shaduh Nongstoiñ ban dawa pynsted bad pyni dak noh ia ka surok ar-lain na Nongstoiñ-Maweit-Kulang-Nongjri kumba ka sorkar kala Kumar.

Kumta ka HYC Maweit Circle ka pyntip ruh sha baroh ki Malik kali kiba iaid lyngba ka surok Nongstoin-Maweit la ki dei kiba kit jingkit ne kit briew ba lashai ka sngi naduh 9:00AM haduh 4:00PM kan don ka jingkhang kali ban nym shah ia ki kali baroh ban iaid lyngba ka surok Nongstoin-Maweit kum ka dak ban pyrahah ia ka sorkar Meghalaya ia ka jingiehnoh bein ia ka dong ka thaiñ Maweit ha ki liang baroh.

Na ka liang jong ka seng ka buh ruh ka jingkyrpad sha ki paidbah baroh kiba dei iaid kiba kamai bad kiba im ja kpoh lyngba kane ka surok Nongstoin-Maweit kin ai ka jingiatreilang bad ka Seng tang ha katei kapor ba la buh kum ka dak ka jingiasnoh kti lang.