Peitngor ki pulit, ba byrngem ka HNLC ia ki Nepali

Shillong, 18 Iaiong:
U SP ka East Khasi u Bah Mariahom Khar khrang u la ong ba ki pulit ki la shim khia bha ia ka jingbyrngem ka seng lehnoh ka HNLC ia ki Nepali ba kin mih noh na Khasi bad Jaintia Hills. Ki pulit ki dang pynlong ia ka jingtohkit ban pynshisha ia kane ka jingbyrngem ka seng lehnoh.
“Ngim shim sting ia ka jingbyrngem na ka HNLC ne na kino kino ki kynhun bad la shim ia ki lad ki lynti ban pynthikna ba ki nongshong shnong kin don ka jingshngain”, la ong u Bah Kharkhrang ha kane ka sngi Palei.
Kane ka jingong u SP ka mih hadien ba ka seng lehnoh ka Hynniewtrep National Liberation Council (HNLC) ka la pynlait kywroh ban hukum ia baroh ki Nepali basah ha kane ka ri Khasi bad Jaintia ba kin mih noh khamtam kito kiba sah ha khappud ka Meghalay bad ka Assam kynthup ha ka thain Langpih, jong ka West Khasi Hills.
Katkum ka jingong u Bah Kharkhrang, kam don kano kano ka jingeh ha ka thain Langpih kumba long haduh mynta. U la ong, kam mut pat ba ki pulit ki shim khia ba kane ka seng ka nang khlain.