| Shillong: I longkmie na shnong Mawmluh, Sohra i Kong Darisuk Kharwanlang i la don 45 snem bad 8 ngut ki khun hynrei ila bteng ban long ka nongmareh da kaba leit shim bynta ha ki jingiakop mareh bapher bapher ha ka jylla bad shabar jylla ruh. Ine I longkmie I shong dukan ha Sohra hynrei im shym la pynsyrwa kai ia la ka por ba kordor ban kilanmet haba ia la dep ia ki kam iing kam sem.
I la jop ruh bun ki jingmareh bad mynta ila shah khot ban leit mareh sha ka jingiakop mareh ka Master Athletic Championship Meet 2019 kaban long ha nongbah Goa mynta u bnai. I la shah jied hadien ba ila wan balai na ka jingiakop jong kane kaba long ha Guwahati ha ki bnai ba la dep. “Ka jingshah jied jong nga ban leit iakhun sha Goa ka dei namar ba nga la wan iakhun na Guwahati bad dei nangne ba kila sa khot ia nga ban leit sha Goa bad lada jop na Goa, ngan leit iakhun sa sha Malaysia’, la iathuh I longkmie Darisuk. Na ka bynta kane ka jingmareh ha Goa, ila pyrshang ban pan jingiarap na ka sorkar hynrei im pat thikna ban ioh watla ila kynduh ia ka director ka tnad ialehkai. I la kyntu ia ki samla ba kim dei ban shong lili pen pen hynrei ki dei ban iaid ban ieng ban khih ban ksar haba ki don por namar ba kan iarap ban pyllong ia ka met ka phad kaba koit ka khiah. |
Phi don ban ong eiei?