Rah ka Umiam United ia ka nam jop ha ka lympung kynjatbol ka NNSSCC

Nongstoiñ: Ka Umiam United ka la ioh ban khur ia ka jingjop ha ka lympung 2nd Knock out Football Tournamement bala pyniaid da ka New Nongstoiñ Sport Social Cultural Club (NNSSCC).

Ia katei ka nam jop ka Umiam kala ioh hadien ba kala lah ban pynliem noh ia ka Laban SC da 3-1 ha ka jingiakhun phainal kaba la long hynnin ka sngi ha ka madan ialehkai jong ka shnong New Nongstoiñ bad ioh rah ruh ia ka song pisa kaba T. 3 lak 50 hajar ryngkat ki trophy.
Haba phai sha katei ka jingiakhun phainal kaba la long hapdeng kitei ki ar tylli ki kynhun kala long shisha ka jingialehkai kaba itynnad haduh katta katta bad na ka liang jong ka Umiam United kala ioh ban pynkhih jar nyngkong eh ha ka minit kaba 17 lyngba u Kyrshan Nongpluh.
Shuh shuh ka Umiam United kala ioh biang ban khyrwit sa 2 tylli kol ki kol kata ha ka minit kaba 75 bad 79 ha kaba u Sheen Sohktung u bala ioh ruh ban rah ia ka bol para mar wei bad u rangapkol ka Laban bad khlem da pynsepei ia kitei ki kabu baroh ar tylli ki kol kila rung beit jlang shapoh ka kol kaba la pynlong ruh ia ka Umiam United ban ioh haduh 3 kol.
Ha shwa ba ka jingialehkai kan poi noh sha kaba kut ka Laban kala ioh ban pyneh daw lyngba ka 1 kol ia kaba la thep da u M. Lamare ha ka minit kaba 87 bad tad haduh ban da wai noh ka jingialehkai ka Laban kala hap ban mad noh ia ka jingshah jop da 3-1 bad watla kala Laban SC kala shah ren hynrei kala ioh pat ban rah ia ka song pisa kaba T. 1 lak 50 hajar tyngka.
Ha katei ka sngi ia ka nam Man of the Match ha katei ka sngi la ioh ban khur da u Sheen Sohktung jong ka Umiam United, Best Goal Keeper la ioh da u Erick Nongkhlaw ka Umiam United, Top Scorer la ioh da u Vickyson Kharkongor jong ka Laban SC bad Player of the Tournamement la ioh da u Shanbor Jyrwa jong ka Umiam United.
Ia katei ka lympung la wan ban pynhap pyrda noh da u bah Kit Hoojon President BJP State Youth Wing u bala long ruh kum u kongsan ha ryngkat ka jingiadonlang ki riew rangbah jong ka shnong New Nongstoiñ, ki dkhot bad nongpyniaid ka NNSSCC kiba la sam ruh ia ki khusnam sha ki nongjop.