Kiba iap na ka jingbthei bom hynnin ka sngi ha ka nongbah Colombo, ki la poi sha ka 290 ngut bad kiba mynsaw, ki la poi sha ka 500ngut, ong ka khubor haduh mynta ka sngi. Ki pulit ki la kem ia ki 24ngut ki briew kiba la suba, ba ki dei kiba donkti ha kaba pynbthei bom ha ki iingmane bad ki hotel bapher.
Ka Shantha Mayadunne (ba ar sha ka diang) bad ka khun kynthei jongka, ka Nisanga (sha ka mon) kiba la shu iap ei tang shi khyllipmat ha ka jingbthei bom ha ka hotel Shangri-La hotel. Kane ka dei ka dur kaba ki shon, tang khyndiat minit shwa ka jingbthei bom.
Mynta ka sngi, dang step phyrngab, la pynlip noh ia uwei u bom, uba la buh hajan ka kad liengsuin jong ka Colombo, ong ka khubor. La iathuh ba utei u bom, u dei uba la thaw da u kynja nar um, ha kaba la buh ha ka lynti ban leit sha ka jaka hiar liengsuin, hynrei ki shipai suin, ki la pynlip noh ia utei u bom, ong shuh ka khubor.
Ha kajuh ka por, ka jingwad jingtip, ka dang iaid shakhmat, na ka bynta ban wad ia ka kynhun kaba donkti halor katei ka jing pynbthei bom kaba triem tam ha Colombo bad ki don kiba kdew ia ki ehrang ISIS, ba ka dei ka kynhun kaba don bynta ha katei ka jingjia kaba triem.
Ki don ki dak ki shin kiba kdew ia ka seng ehrang National Thowheed Jamaath (NTJ), kaba dei ka seng ki ehrang Muslim, ha kaba la seng ha u snem 2014 ha Kattankudy, kaba don sha mihngi jong ka Sri Lanka.
Ki don ki riew buddien kiba kam ba katei ka seng, ka dei kaba kyrshan ia ka seng Islamic State bad la iathuh ruh ba U Zahran Hashim, uba dei uwei na kiba pynbthei bom hynnin ka sngi, u dei u nong seng jong ka NTJ.
Kiwei pat ki lad khubor, ki iathuh ba ka India, ka la pyntip lypa ia katei ka jingthmu ki shitniam Muslim, la shiphew sngi mynshwa sha ka Sri Lanka, hynrei la iathuh ba ka Sri Lanka, kam shym la shim khia satia.
Phi don ban ong eiei?