Shillong, 16 Iaiong:
Ka jingmih jong ka khubor halor ka jingleit phai shnong jong u Bah Mit Mawkon, ka la pyn lyngngoh ia bun bah ki nongpule kotkhubor, kiba la wad jingtip shaphang katei ka jingjia na ophis U Rupang.
Nalor ki riew paid bah, wat ki nongthoh khubor ruh,ki la iakren bad u nongthoh, na ka bynta ban ioh jingtip kham bniah, halor katei ka jing jia, ba kumno u briew, uba la khein iap bad uba la dep buh maw shyieng, ba un dang leit phai biang sha la shnong, ban iakynduh, ia la ka jong ka kmie, hadien 20snem kynthih.
La iathuh, ba U Bah Mit Mawkon, uba ka shnong trai jong u, ka dei na Tangmang, u dei uba la don khun don kti sha Sutnga, hynrei, namar ba ka kurim jongu, ka la khlad noh; kumta ka mih, ka jing bym ia dei bad ki khun jongu bad katei ka la pynlong ruh ia u, ba un leit sah noh sha krem dewiong bad ki khar Nepali, ha kaba ula pynlut por da ki bun phew snem sha katei ka krem.
La iathuh ba ka jingleit phai jong U bah Mit sha la shnong, ka dei hadien, ba u nongknia, ula ai jingmut ba un leit phai sha la shnong, namar ba u shim, ba ka jingpang jongu, kaba la neh la 10snem kynthih, ka dei namar ka daw iing.
Lah ban pynkynmaw, ba ka la mih ka khubor ba U bah Mit, ula shah pyniap bad ba la bret noh ia ka met jongu hapoh nala. Kumta, na ka liang ka iing, haba kim shym la ioh lad ban leit wad ban leit shim ia katei ka met iap, ki la sdang ban ia phah knia bad ki nongknia, ki iathuh ba utei u rangbah, ula iap. Haba ka jingknia, ka iathuh ba ula iap, la pynlong sa ka jingtei ia u maw shyieng bad ba la pynlong ruh ia ka jing ia khawai iap briew, ha kaba la khot ia ki kur, ki kha ki man, ha katei ka sngi khawai, kaba lum hi kum ka sngi ba khawai iap briew bad hadien kata, ym shym la tip shuh bad ym shym la don hi ruh, ba mutdur ba utei u briew, u dang im.
Phi don ban ong eiei?