Thwet ka HNLC ia u pyrsa jong u pulit, uba syntiat sha Bangladesh

Shillong: Wat la ki dei ki briew jongngi, hynrei ngin nym riej satia bad ngin leh da kaba tyngeh, ong ka kyrwoh na U bah Sainkupar Nongtraw, General Secretary bad Publicity Secretary ka HNLC mynta ka sngi.

Katei ka long ka jingai khubor, halor ka jinglap jong ka HNLC, ba ki don ki briew jong ka sorkar India, kiba dei na ka tnat RAW, kiba trei kam ha Bangladesh bad kiba buddien halor ki jingtrei kam jong ka HNLC, ha kaba la iathuh ba uwei na kitei, u dei u pyrsa kurim jong uwei u heh pulit, uba wad khubor shaphang ka jinglong jingman jong ki dkhot ka HNLC ha Bangladesh. Ka HNLC, ka dang wad bha ia utei u briew bad ha kajuh ka por, ka maham tyngeh, ba u dei ban sangeh shi syndon, ia katei ka jingleh jongu bad la ong shuh shuh “Lada um sangeh, ngin sa leh da ka kam lane ka sorkar Bangladesh, kan sa leh da ka kam”.

Ka kyrwoh ka ong shuh shuh, ba kitei ki briew jong ka RAW, ki ju pynmih ia kine ki kam pynshit hapdeng ki trai shnong bad ki dkhot jong ka HNLC bad ki leh ia katei, ym tang ha Bangladesh, hynrei ha kiwei kiwei ki ri ruh kumjuh. Ka HNLC, ka kynnoh ia ki shipai BSF lem bad ka sorkar jylla, kaba ailad ia ki RAW, ba kin iuh kjat ha Bangladesh bad la ong ba kane ka dei ka jingma kaba khraw ia ka Ri Bangladesh bad kaba lah ban wan rah ia ka jing ia kynad kaba jur ha ki khappud jong ka kine ki ar tylli ki Ri ba marjan.