Ka Pragya Thakur, ka kandidet jong ka seng BJP, ka ban ia khun pyrshah ia U Digvijaya Singh jong ka seng Congress ha Bhopal, ka la ioh biang ia kawei ka notis na ka Election Commission, kaba dei ka notis kaba ar naduh ba ka la shah jied ba kan iakhun kum ka kandidet na Bhopal bad kane kaba mynta, ka long ba ka la mynjur ba ka leit pynjot ia ka Babri Masjid ha Ayodhya.
Ka Pragya, kaba 48 snem ka rta, ka dei kaba shah pynngat ha ka jingbthei bom ha Malegaon, ha kaba hynriew ngut ki briew ki la iap bad sa 100ngut ki mynsaw ha u snem 2006 bad ialade, ka la ngat ha ka kyndon Unlawful Activities (Prevention) Act. Mynta ka don ha ka jingioh jamin, ha kaba u kpa jong uwei na kiba iap, u ia khun tyngeh hapoh kashari pyrshah ia ka Thakur.
Haba kren ha ka television Channel TV9, ka Pragya Thakur, ka kam ba ka la leit pynjot ia ka Babri Masjid, ha ka 6tarik Nohprah 1992 bad ka ong ruh ba ka sngew khain shibun, ia la ka jong ka jingleh.
“Ngi la weng ia ka dak jaboh na ka Ri, ngi la leit ban pynjot ia katei ka jingtei. Nga kiew ha jrong duh jong katei ka jingtei, nga la pynpait bad nga da sngew khain shi katdei ba U Blei, ula ai ianga ia katei ka lad. Ngin pynthikna ba ia ka Temple U Ram, yn tei ha katei ka jaka” ong ka Pragya.
Phi don ban ong eiei?