Colombo: 207ngut ki briew ki la shu iap ei mynta ka sngi rakhe Easter Sunday, haba ki ehrang ki leit hiar thma ia ki Khristan ha Sri Lanka, da kaba pynbthei bom ha ki phra tylli ki jaka, ba kynthup ia ki hotel bad ki iingmane ruh kumjuh.
Ka iingmane jong ka St Anthony’s ha Kochchikade ha Colombo, kaba la jot thiaw hadien ka jingbthei bom.
Na ki hynriew tylli ki jingbthei, ki la don 500ngut kiba mynsaw, ba kynthup ia kiba na Japan, na England bad ki don ruh 35ngut ki bar ri kiba na UK, US, Netherlands bad Portugal bad ki dei napdeng kitei ki 207 ngut kiba iap.
La iathuh ba ka don sa kawei pat ka jingbthei kham hadien, kaba dei ka jingbthei kaba hynniew shathie ka Colombo, ha Dehiwala, kaba la pyniap ia 2ngut ki briew bad nangta sa kaba phra kaba dei ha ki bynta ba shatei jong ka nongbah ha Orugodawatta, kaba pyniap ia 3ngut ki heh pulit bad katei ka dei ha ka jingleit talasi jongki ha ki iing briew.
Ka tnat iada ri jong ka Sri Lanka, ka la pynjari da ka korphiw mardor bad la iathuh ba la khang ia ki social media bad kiwei ki rukom pyllait khubor jong ki riew paidbah.
U Ruwan Wijewardene, myntri iada ri ka sorkar Sri Lanak, u iathuh ba ki bor sorkar, ki la ithuh ia kito kiba donkti ha katei ka kam pyntriem bad kin sa tian bishar shen ia ki.
Ar tylli na ki jingbthei kiba kham triem shibun, ki dei kiba la pynbthei da ki briew kiba pyniap hi ialade, ong ka khubor.
Ki khubor ki iathuh ba ki pulit ki la kem hynniew ngut ki briew kiba donkti ha kitei ki kam pynbthei bom, kiba la pynbthei ia 3tylli ki iingmane bad saw tylli ki hotel.
Phi don ban ong eiei?