82hajar ngut beh poiwir ka sorkar UPA, 1,822ngut beh ka sorkar BJP:Mukul

Guwahati:U Mukul Sangma, myntri rangbah barim ka Meghalaya, ula iathuh myn hynnin ka sngi, ba ki don 82hajar ngut ki poiwir, kiba la dep pynher krad, ha ka por ba ka don ka sorkar UPA ha Delhi, ha ki 10 snem ba ladep, katba ka sorkar BJP, kaba don ha Delhi, ka lah ban beh tang 1,822ngut kitei ki poiwir.
Haba kren sha ki kotkhubor ha Guwahati, U Sangma, uba dei u Chairman ka North East Congress Coordination Committee (NECCC), ula kynnoh ba ka seng BJP, ka shu pynheh tang ka sur, na ka bynta ban jop elekshon.
“Ka BJP kam don jingmut satia ban pynduh jait ia ka jing tuid jong ki poiwir, hynrei ka don tang ka jingmutdur satia bad ki kren da kumwei, ha shwa ka elekshon bad ki sa leh da kumwei pat, ynda haba ki don ha ka bor” ong U Sangma.
“Ka sorkar jong U Narendra Modi, ka la pheil, ha kaba peit ia ka suk ka sain bad ka shongsuk shongshngain jong ka Ri. Ka Ri ka don ha ka jingshong syier ha kine ki sngi bad ka sorkar India, ka la pynjot ia kiba bun bah ki bynta jong ka synshar paidbah ha ka Ri” ula ong shuh shuh.
U Mukul, u kynnoh ruh ba kito kiba ialeh pyrshah ia ka sorkar, ki shah kynnoh bad ki shait pyn ngat ha ki ain pyrshah ri, kumba ka long ia kito kiba pyrshah ia ka ain Citizenship (Amendment) Bill 2016 bad u ong ruh ba ka sorkar BJP, kam shym sngewthuh satia ia ka jingsngew jong u paidlang ka Jylla Assam bad ka thain shatei lam mihngi.