Nongstoiñ:Myn hynnin ka nohsngi, ha ka por kumba 12:45 PM, u wei u rangbah u bala tip kyrteng kum u bah Tobias Sun, u la kam ba u la iohi ia u wei u briew u bala thmu ban pied bad rung tuh ha kawei ka jaka sah pulit ha Nongstoiñ bad haba u pyrshang ban leit bat la ong ba u tei u briew u la phet krad noh.
Katkum ki tyllong khubor na ki pulit la ong ba u tei u briew u bala shah kynnoh ba thmu ban pied bad rung tuh ha ka jaka sah pulit u dei uba la tip kyrteng kum u Albinus L. Marshillong ba shong ba sah ha Them Iew Nongstoiñ.
Shuh shuh la ong ruh ba katkum ka jingiathuh u bah Sun, la ong ba ha katei ka por u la iohi ia u bah Albinus L. Marshillong u bala pyrshang ban rung tuh ha ka ïing sah jong u Rotching Momin 30 snem u ba dei ruh u pulit langrut ba trei hapoh ka District Court Nongstoiñ.
Na ka liang jong u Rotching Momin, ha kaba iadei bad katei ka jingjia u la leit ruh ban ujor sha thanad Nongstoiñ pyrshah ia u tei u briew bad ki pulit hadien ba kila ioh pdiang ia ka jingujor, ki la leit ban peit ia ka jaka sah ka jong u tei u pulit langrut ha kaba ki la lap ruh ia ki dak ki shin kiba la pynsuba ba ka lah don ka jingthmu ban pied ia ka ïingsah jong u.
Kumta ki pulit ki la pynlong ia ka jingthwet ia u tei u briew ba la shah kynnoh ban lap ia ki jingshisha bad ha kajuh kapor kila register ruh ia ka case katkum ka case number 36(04)19 u/s 454/380/511 IPC.
Phi don ban ong eiei?