Shillong, 16 Iaiong:
Ka Khasi Jaintia Presbyterian Assembly (KJPA) ha kane ka sngi Balang ka la shimti noh ia ka conference hall ha IGP ba la ai mynshwa sha ka Martin Luther Christian University (MLCU) ban pynlong kum ka opjis naduh ba sdang ha u snem 2005.
Ka Balang ka la shimti noh ia kane ka iing hadien ba ka la rai ban sangeh noh ia ka jingiadei bad ka university ha ka jingialang kaba long ha u Iaiong ha u snem 2012.
Ha kane ka jingshim ti mynta ka sngi, ka Ba lang ka la pynlong ia ka jingduwai kyrpang ba la don lang u Moderator ka KJPA u pastor DS Soh khlet, u secretary ka KJP u Pastor NS Phawa bad u Chairman ka KJPA Trust Commitee u pastor W Warbah nalor kiwei.
Haba kren ha kane ka jingialang, u Pastor Phawa u la ong ba ka MLCU ka la aiti ia ka iing sha ka KJPA ha ka 14 tarik Iaiong.
“Ka jingaiti ia kane ka iing ka long namar ka jingpyrshang jong u vice chancellor ka university u Bah RG Lyngdoh”, la ong u secretary ka KJPA.
U la iathuh ba ka university kam pat siew ia ka ram sha ka Balang kaba dei ha kine ki khyndiat snem ba la dep.
“Ngin iai bteng ban buddien bad kane ka university ba kan siew noh ia ka ram baiwai”, la ong u Pastor Phawa.
Ki la ong ruh ba ki la dep iakynduh ia ka
sorkar ba kan weng noh ia ka kyrteng ka Balang na ka university.
Ha kawei ka liang, u Vice Chancellor u la pynpaw ia ka jingsngewnguh ia ka KJPA kaba ai ia katei ka iing ia ka university ha ki snem ba la dep.
“Kane ka jingleh jong ka KJPA kum ka nongkyrshan ka la ailad ia ka university ban pyndep ia ki kam jongka”, la ong u Vice Chancellor, Bah RG Lyngdoh.
Ha kane ka sngi la don lang u Registrar MLCU u Rev EH Kharkongor, Senior Administrative Secretary KJPA Rev NS Phawa, Administrative Secretary KJPA Rev. ER Kharkrang, bad u Chairman kaTrust Committee KJPA Rev. W. Warbah.
Ka jaka thymmai kane ka university ka don ha Dongktieh-Nongrah, Shillong.
Phi don ban ong eiei?