Nongpoh: Haba shimkhia ia ka jingujor na ki paidbah, kiba la pynpaw ia ka jingpyrshah kaba jur halor ka jingthmu ka MeECL ban pyntreikam noh da ki Prepaid Meter ha ki shnong kiba hap hapoh ka Nongpoh Town Committee, hynnin ka sngi na ka liang ki dkhot ka HNYF, Northern Region, ki la leit ban kynduh ia ka Kong A Majaw, EE ka Western Revenue Division kaba don ha Nongpoh, na ka bynta ban pyrshah halor katei ka jingthmu pyndonkam noh da kitei ki Prepaid Meter ha ki iing briew.
Ha kaba leit ban kynduh ia ka Kong A. Majaw, ki dkhot ka HNYF kaba la ialam da u Bah Donroy Kshiar, Asst General Secretary ka HNYF, NR, ki la pynsngew ba ka daw hi kaba la pynlong ia ki ban pyrshah, ka dei hadien ba ki la ioh shibun ki jingujor na ki paidbah bad kiba la pynpaw ia ka jingbymhun halor kitei ki Prepaid Meter, namar ba kim pat ioh ia kata ka jingpynshai kaba janai na ka tnat MeECL.
U la ong ruh, ba lada ka MeECL ka kwah ban pyntreikam da kitei ki Prepaid Meter, ka la dei ban pynshai shwa sha ki paidbah, namar bun na ki paidbah kim pat ioh jingshai halor kitei, namarkata kumba ka long ia mynta hi ka seng kan hap pyrshah beit, hynrei dei tad hadien ba ka MeECL kan pynshai sha ki paidbah bad ioh ia ka jingmynjur na ki paidbah ha ki shnong bapher bapher.
Haba pynshai sha ki dkhot ka HNYF, ka Kong A. Majaw, ka la ong ba ia kitei ki Prepaid Meter ki dei kiba la pynmang da ka Sorkar kmie lyngba ka skim kaba la tip kum ka Integrated Power Development Scheme (IDPS) bad ka jingthmu hi ban pyndait ia kitei ki Prepaid Meter ka long tang sha kito ki iing kiba thikna ka rukom siew ia ka bai bording, hynrei ia kito kiba ju pynsah ia ka bai bording ym lah ban pyndait ia kitei ki Prepaid Meter.
Ka la iathuh ruh, ba lyngba jong katei ka skim ki la don haduh 700 tylli ki Prepaid Meter kiba la mang ban pyndait ha ki shnong kiba hap hapoh ka NTC.
Haba iadei bad ka jingdawa da ka HNYF bad kata ka long ban ai shwa ia ka jingpynshai paidbah ha ki shnong, ka Kong A. Majaw ka la ai ia ka jingmynjur bad leh ia katei kaba la dawa da ka HNYF.
Phi don ban ong eiei?