Ka MDC hostel, kum ka ktem ki kam awria

Shillong, 16 Iaiong:
Ka MDC hostel ka KHADC ka la long kum ka ktem jong ki kam sngew bha ha kaba long laitlain ia ki nongrung nongmih ha kane ka hostel.
Kane ka hostel jong ki MDC la long kum la jaka iadih iabam iadih sngewbha ha jaka ba kan long ka jaka sah jong ki MDC khamtam ha ka por miet.
Katkum ka jingia kren bad ki briew jong kane ka hostel, la mih bun ki jingjia ki nym sngew tynnad satia ha kane ka jaka sah jong ki MDC , bad ka daw ka dei namar ba ka jingioh lad jong ki briew ba nabar ban wan ialeh sngewbha hapoh hostel da ka jingiadonkti lang kiba sah ha kane ka hostel.
U nongthoh khubor u la ioh ban iakren bad ki katto katne ki briew ba peit ia kane ka hostel, ki la iathuh ba bun kiba sah ha kane ka hostel kim dei ki MDC hynrei dei ki briew jong ki MDC kiba wansah.
Ha ka por miet, kane ka hostel ka long kum ha hotel ha kaba ki briew ki la wan ban leh ia ki kam sngewbha ki kam awria ba har rukm, iadih iabam kumba ka dei ka hotel.
“Kane ka hostel ha man ka sngi Thohdieng, sngi Saitjain bad sngi Blei, ka long kum ka ktem ban wan leh ia ki kam awria ba har rukom”, la ong uwei u nongtrei ba peit ia kane ka hostel.
La ong ba ha kane ka hostel, don tang uwei u chowkidar uba ap bad haba ki briew ki wan ki leh main bha da kylli ruh, ki ong ba dei ki briew jong ki politishian.
Don ki sngi ba ka hostel ka long kum ka jaka shad, jaka rwai, jaka leh sngewbha haba ki briew ki wan kulmar, khamtam ha ki sngi shuti.
Bun ki briew ba wan ki dei nabar kiba iadei paralok bad kito kiba sah ha hostel bad haba ki wan ki leh ia ki kam ba isaitmet.
“Kane ka jingwan ka EC ba thymmai, kan pynkhuid ia kane ka kam jaboh kaba don ha kane ka hostel”,la ong uwei u ba dei peit ia kane ka kam.
La sngewthuh ba ki bor ba dei peit ia kane ka hostel, ki la thoh sha ka EC ban pynthymai ia ka rukom treikam jongka ban pynkhuid ia kane ka kam.