|
Khana babteng
Ka Lanosha ka shong bhek ha jan met ka Kmie.
“Ki ia kmen bha phi Mei .. haba shu peit na sha bar te…” La jubab ka Lanosha
Ka Kmie ka la bteng ban tip biang
“Ki nong sor te ki ia riewspah ong khun…” Ka peit sha la ka khun
“Hooid ban ia nujor bad ngi te ym iahap shuh phi Mei … Ki la tam shibun bha….” La jubab ka khun
U kpa uba dang pyn ot ia kata ka dohsyiar u la kem ktien lem
“Ha ba kumta ki ia pariah parai ia phi khun .. ?” U sngap ba kan jubab
“O ki ia pariah bha… Ki ia ap bad ia wan lut ki hynmen jong I Bah Deng ruh. Shisien peit te ki briew kiba I bha hi.. Ki ba ia I leh rit…” La iathuh bniah ka khun
Ka Lanosha ka la iathuh lut khoit ia kiei kiei kiba ka iohi bad mad ha kata ka jingleit iuh kjat ba nyngkong eh ha iing u Bahdeng.
Hadien kata u kpa jong ka u la kylli pat
“Te kim ong wan biang khun…” U da rkhie artat
” Ki ong sah miet tangba nga iathuh ba donkam ban wan phai sha iing…” La iathuh ka Lano
“Kaei ka ba phi iathuh te khun nga sngew kumba ki dei ki briew ki ba biang ba bit… Tang ba ka shong eh da ha ka burom jong phi…” La ong u Kpa
“Hooid khun ka ba ong I kpa dei kaba Kongsan…” La kem ktien lem sa ka Kmie
Kumta u Kpa u ieng noh na ba shong bad u leit sait ia ka doh bad u khreh ruh ban shet ia ka. Katba u kpa u nang shet nang tiew, ka Lanosha ruh ka khreh ban iarap kam iarap jam noh ia la ka Kmie bad hadien ba la ih lut kiei kiei ki ia bam ia dih noh bad ki khreh sa ka ban leit thiah noh sha la ka jong ka jong.
Haba la poi ha jingthiah ka Lanosha ka sdang ban phone sha la u baieid . Ka Lanosha mynta hadien ba ka la wan na ing jong u Bah Deng ka la nang theh ka jingieid ha u. Lyngba ka phone ki iakren bad ia syllok lah jan haduh shiteng Synnia . Ki la ioh ban nang ia phylliew shuh shuh shibun kiei kiei.
Haka sngi ka ba bud dang step ka Kongthei Daplin ka la wan ha iing ka Lanosha .
“Lano phi dang leh aiu…” La pyrta ka Kongthei
“Are I Kongthei phi la wan shane … ” La kren kyndit ka Lanosha
“Hooid kein pha nga la khie dang step eh te… Ta ka daw nga la hap ban mih wan kai noh shane…” La iathuh ka Kongthei
“Rung rung Kongthei ale nga te nga dang dihsha.. ” la ong ka Lanosha
Kumta hi ka Lanosha ka la theh sha lang ia ka Kongthei .
“Dih Kongthei malu ma la…” La ong ka Lanosha
“Ma lu ma la kat kine ki jingbam… Phi wan sor ne…” La buh jingkylli ka Kongthei
“Hooid nga wan mynnin..”. La jubab ka Lanosha
“Dei ta ka daw la ithuh hi tang u jingbam ruh…” La ban ktien ka Kongthei
Ha la mynsiem ka Lanosha ka mutdur imat la don ba iathuh khubor eiei. Hynrei jait ba kam kylli hi pat ka shu sngap la ka sngap bad ka sdang iathuh khana noh shawei. [yn dang bteng]
|
Phi don ban ong eiei?