|
Khana babteng
Katba dang shong taxi ka Lanosha ka la pynpaw ha Bah Deng
“I Mei bad ki hynmen jongphi ki ba I donburom suda… Tang ba nga pat haba nga pyrkhat ha lade hi, nga sngew leh rain namar nalor ka duk sa ka biej…ia lade bad ka iing ka sem ruh…” Ka Lanosha ka la kren mian mian
“Wat ong kumta Lanosha phi la iohi hi katno I Mei bad ki hynmen jong nga ki I kmen ban iohi iaphi… Phi iohi hi kumno ki leh …” La phai ktien u Bah Deng
“Hooid nga iohi tang ba nga shu ong ba lada ia nujor hi ka iing jong phi bad ka iing jong nga la jngai bak lybak ha baroh ki liang…”
“Phi lah ban sngew kumta tangba pynduh noh ia kata… Phi ruh ha kawei ka sngi don ka jingkyrmen ba U Blei Un sa kyrkhu kumba U kyrkhu ia ngi…” La phai ktien u Bah Deng bad ka rkhie
“Ha phi nga kyrmen skhem …”La phai ktien sa ka Lanosha
Kumta hi ruh ki la poi noh ha Motphran . Ki ka ialam la ki kjat beit beit sha khlieh iew sha stand kali nongstoin. U Bah Deng u la pyn thied lynti tang shi kilo I doh syiar bad katto katne ki jingbam dihsha ba ka baieid kan rah rneng sha la iing.
“Bah Deng yn pynlut sbai than ia lade. Phi la shu lut baroh naphi shim lang noh na nga heh” . La tyrwa pisa ka Lanosha
“Shuh phi ine lei.. sa leh aiu, nga la jan dei hi te ban pynbiang ia phi na dong sha dong..” la kynhed pynban u Bah Deng
“To kata khublei shibun eh… Ngan iathuh ha iing ia kine kiei kiei kiba phi pynbiang ia nga ..” La phai ktien ka Lanosha
Haba la poi ha Sumo ruh u Bah Deng u la siew lypa noh ia ka bai shong jong ka. Haduh ban da mih ka Kali u Bah Deng u sa leit phai noh sha la iing.
Marsien lait ka khmat ka Lanosha u Bah Deng u don ka jing sngew sahnud namar ba um leit on iaka haduh shnong. Kumjuh ka Lanosha ka la nang sngew shaniah ia u mynta ha ba ka la iohi ia ka iing ka sem bad ruh ia ka jinglehbha jong u. Marwei hangta ha ba shong ka la khap la ki khmat bad puson marwei marwei shaphang jong u.
“U Bah Deng u la ieid shisha ia nga, kumno pat shaphang I Kongthei … Lada I tip bapli te in iam rangbah bad in ym kren shuh artat ia nga tharai …” Ka Lanosha ka la mutdur ha lade marwei marwei.
Lynter lynti u Bah Deng u la phun iaka ba kan shngain . Ha ba la poi ha iing ka Lanosha ka la sei ia kita ki mar ba la pynthied u Bah Deng bad ka da iathuh artat ha la ka Kmie
“Peit Mei kine pynthied I pyrsa jong phi…”ka la kren biria
“Ani balei pha shim kumta bapli…” La ong ka Kmie
“Ym shim kumno ha ba lah thied te… I la pynsiew nadong shadong nga lei khlem lut eiei…”La phai ktien ka Lanosha
Hadien shiphang ar phang ha ba la kem dum ka bneng la wan rung sa u kpa jong ka
“Khun phi la wan slem…” U la kylli
“Pat slem re phi Pa… O lah wan ma phi, sa pyn ot lem noh ia kane ka doh syiar…” La jubab bad bthah ka Lanosha
“Balei phi da thied bun katne eh..” la ong u kpa
“Thied I Bah Deng phi Pa.. “la iathuh ka khun
“U briew ba la da kloi sat ban thied jingthied… Kumno khun ki leh ia phi haba phi la wan kai mynne..’ la kylli u Kpa
Ka Lanosha ka la iathuh shaphang ka jingleh jong ki baroh ia ka.
“Ki briew te Pa kiba da I bha… Toi ban ianujor bad ki bad ngi te ym iahap shuh…” La iathuh ka khun
“Kumno I Kmie u Bah Deng I ong ia phi..?”. [yn dang bteng]
|
Phi don ban ong eiei?