|
Khana babteng
Katba nang iaid ki sngi, ka jingiadei jong ka Lanosha bad u Bah Malki ka la nang jan nang jan watla na ka liang ki ba ha iing jong u ne jong ka ruh kim pat tip bha. Hynrei ka ba sngew synei pat ka long ia ka Kongthei Daplin namar kam pat tip khubor eiei shaphang u Bah Malki. Ka jing lah buh rieh jong ka Lanosha bad u Bah Malki ia ka jingiadei jong ki, ka pynlong ba wat ka Daplin kaba la heh rta ruh kan ym ithuh eiei ia kata.
Haba ka jingiadei jong ki la iaid sha ka ar snem eiei. Ka Lanosha ka sdang ban pynsngew noh ia kata ka khubor ha la iing. Tangba ka la maham lypa ia la ki Kmie ki Kpa ban ym lait ktien eiei sha wei pat, namar ba u Bahdeng u dei ruh u paralok uba ia ithuh bad iajan bha bad ka Kongthei Daplin .
Ka Kongthei Daplin man ka por ka shait leit mih sha ophis jong u Bah Deng Malki ban iakynduh bad u. Hateng hateng haduh ba wat u Bah Malki ruh u la sngew wit. Tangba um nud pynpaw eiei pat namar u sngewthuh bha ba ka ieid ia u.
Ha ka sngi shuti Tlang jong ki skul, u Bah Deng u la pynpaw ha la ka baieid , ka Lanosha ba u kwah ban ialam kai ban pynithuh noh iaka ha la iing.
“Lano nga la kwah ban ialam kai noh iaphi sha iing, khnang ba kin ithuh iaphi.. Phi long…?” U la buh jingkylli
“Hooid balei ym long…Ngin ia leit noh kein namar mynta ba dang ioh shuti…” Ka la jubab
“Haba kumta lano ngin ia leit noh…”la kylli biang u Bah Deng
“Kano Kano ka sngi ruh ka biang hi…” La phai ktien ka Lanosha
“To kan kham bha ba ngin ia leit noh ki kynja sngi Saitjain…mo namar nga ioh shuti..” la ong pat u Bah Deng
“Kata ruh ka biang hi… Tang ba ngin shu leit bad wan phai noh mo…”, La ong pat ka Lanosha
U Bah Deng namar ba u da kwah ba kan sah miet u la phai ktien
“,Phim long ban sah miet …” U peit sha ka
“,Em Bah Deng kam pat dei ka por ba ngin leh kumta….” La ong pat ka Lanosha
“Ym lei lei phi… Sa lei tang shi miet….” La pyrshang pynbor u Bah Deng
“Em Bah Deng pyrkhat lem ia ka burom jong ngi ki Kynthei…. Phi ki shynrang te ka biang hi kein hynrei ha ngi ki Kynthei te ka eh than …”, La said nia ka Lanosha
Ha kaba khatduh u Bah Deng u la hap ban pyndem noh ha ka jingkyrpad ka Lanosha.
“,To ym lei lei Lano ngin ia leit la sngi saitjain jong kane hi ka taiew bad phi sa wan phai noh.. nga te ngan sah shuwa sha iing..” La ong u Bahdeng
“Kata kein Bah Deng ka biang eh… Namar ka long ka ba donburom la da ngin leh kumta….” La ban ktien ka Lanosha
“Lanosha nga sngewthuh Shisha mynta ia ka jing khraw ka jingpyrkhat jong phi…Phi dei ka briew ka ba la rangbah shisha…”, U Bahdeng u la iaroh kylla ia ka[yn dang bteng]
|
Phi don ban ong eiei?