Ka seng pynkhuid Sor Shillong

Shillong,16 Iaiong:
Mynta ka kynti ka la mih sa kawei pat ka seng ban pynkhuid ia ka sor Shillong, ka Megha laya Eco-Friendly Student’s Union, ka seng kaba la seng naduh ka 29 tarik u lber 2014 ha kaba la pynbam smai ia ki nongkitkam bad ki dkhot da u bah RG Lyng doh,Vice chancellor ka Martin Luther University. Haba kren sha ki nongthohkhubor mynta ka sngi u bah Rang dajied Marwein president katei ka seng u la ong ba ka jingseng ia katei ka seng ka long ban wanrah biang sa shisien ia ka jingkhuid jong ka nongbah Shillong kaba la ju bna nam ha ki mynnor.
Ka jingthmu ba katei ka seng ka don ka long ban wanrah ka jingsngewthuh sha ki paidbah ia ka jingdonkam ka jinglehkhuid ba kin ym bret jaboh pathar bad leit shabar pathar ha ki jak paidbah bad ban ai ka jingiatreilang bad ka seng ka ban leit sha manla ki dong bad ki shnong ban ialap sha ki paidbah shaphang ka jingdonkam ka lehkhuid bad ban oh synniang ruh kum ki jak bret niut ha ki shnong. “Tang ka jingleit lum jaboh ki kali Municipal na ki thliew ing kam pat biang” ong u President katei ka seng, ka sorkar ruh ka donkam ban leh

eiei ban thaw ia ki lad ki lynti thymmai halor kumno ban sain ia ki jaboh ha ki juk stad mynta.
Katei ka seng ka la pynkynmaw ia ki jingmynsaw na ki jingpyndonkam ia ki plastic, ka la ong ba shen kan leit ban ia kynduh ia ki bor sorkar halor katei ka rukom khnang ba yn lah ban leh eiei watla pyndonkam ia ki.
Katei ka seng ka la kubur ruh ba ka jingpom dieng, ka jingkhlong maw khlong shyiap ka dei kawei na ka io ka kot ki briew ha kane ka jylla, ha ka juh ka por ka kwah ruh ba ka sorkar kan wanrah da kiwei pat ki lad ki lynti ban ai kam ai jam ia ki samla bad ia ki paidbah khnang ba kin kiar noh na katei ka kam. Ka la pyni ruh ba ka jingdih duma ha ki jaka paidbah ka ktah bha ia ka koit ka khiah kaba kham jur ia ki briew ba don hajan ym ia ki nongdih bad ka la ong ba shen kan leit ban ia kynduh ia u Myntri Rangbah ka jylla bad ban ai ruh ia ka mat jingdawa ba ym dei shuh ban sha dih duma ha ki jaka paidbah.
Ki nongialam katei ka seng ba kynthup ia u President,Secretary u bah Napoleon Mawphniang bad u Vice President bah Jeremy Mawiong ki la kyntu ia ka sorkar ba kan pynkhren noh da ki rukom pyntreikam ia ki jaboh kumba leh kiwei pat ki ri, ki la ong ruh ba ki la ia kynduh ia u DC ka East Khasi Hills ban ia pyrkhat halor ki jingmih lyer jakhlia lyngba ki kali.
Haba pynkut ia ki jingiakren , katei ka seng ka la ong ba lyngba ki jingleh khuid kan long ruh ka jingkamai ia kane ka jylla lyngba ka jingkhring ia ki nongwan jngohkai pyrthe na kylleng ki Ri bad ki jaka, bad kan long ruh ka lad ioh kam ioh jam.