|
Ngi iohi kham mynshwa ka jingong ki CEM barim KHADC ba kim pdiang ia ka byelaw jong ka MUDA hynrei ka kham biang ka BYELAW jong ka KHADC kaba la phah sha Secretariat. Kumta ngi kyrpad ia u Bah Teinwell Dkhar, CEM, KHADC bad baroh ki 29 ngut ki MDC kiba THYMMAI mynta, bad ka Synjuk ki Nongsynshar Shnong Ka Bri Hynniewtrep, Ka Dorbar Khlieh Nongsynshar, bad ki seng bhalang ban sngewbha pynshai paidbah kaba kumno ka AIN shna iing kaba phi la phah sha Secretariat.
Sngewbha pynshai kyrkieh katno phut ka iing lah ban shna na surok kali, hato donkam parking ne em haba shna iing, la shah katno ngut ki khun ha kawei ka kamra thiah haduh ka rta kaba katno lah ban thiah lang ki khun shynrang kynthei ha kajuh ka kamra thiah, hato katei ka AIN shna iing kaba la phah ki bor KHADC sha secretariat ka hap ne em hapoh ki kyndon jong ka Disaster Management Act 2005 bad kiei ki kyndon jong katei ka Disaster Management Act 2005. Hato lah ne em ban thaw dukan, kat ba mon, hato lah ne em ban buh parking ieng kali baroh shimiet ha surok, hato lah ne em ban buh hostel samla pule da ka spah ngut khlem ka umbam umdih kaba tikna, hato lah ne em ban thaw 4 mala ne tang 3 mala. Ka surok kumba iohsngew ka dei ban long ne em 50 foot ka jingheh khnang ban her bad rung ka 108 bad kan mih ka Fire brigade (kali pynlip ding) ha kajuh ka por.
Lada don ki MLA, MDC, MP, ki IAS, ki MCS, ki pulit ki Rangbah Shnong, ki Sordar Shnong, ki Rangbah Dong, ki Syiem, Doloi, ne ki Lyngdoh, ki Myntri, ki heh seng bhalang kiba pynkhien ia kitei ki AIN ba phi ia shna kaei ka jingpynshitom don ne em ka Ain pynpra kumba don ka Demolition Act khamtam ba ngi don ha ka high seismic zone.
Sngewbha iarap pynshai kyrkieh kiei ki jingiapher (points of difference between MUDA byelaw and KHADC byelaw). Sa kawei kaba ngi shem bun ki Sordar ki Rangbah Shnong, ki Syiem, ki Sirdar, ki Sordar, ha Hima, Raid bad Shnong kim juh lum Dorbar kut snem bun snem ban ai jingkhien te kumno kin long ki stad ha ka shna iing.
Kumta la kyrpad ia phi ki stad ki jhad ia i CEM KHADC bad ki 29 ngut ki MDC ba phin pynshai paidbah kaba kumno ka Ain shna iing phi la phah sha secretariat La kyrpad ruh ia ka Synjuk ki Nongsynshar Shnong Ka Bri Hynniewtrep, bad baroh ki seng bhalang (HNYF, KSU, FKJGP, RBYF, JSU, HYC, ter ter) sngewbha pynshai ia ngi ki paidbah kiba sah ha ka umdum ioh wan pynpra pynban da ka AIN ba shna ka KHADC.
khublei,
Ms E Syiemlieh,
Jaiaw,
|
Phi don ban ong eiei?