Julor 35 tylli ki longiing, ba lynshop ka eriong ha shnong Mawkajem

Shillong: Ka jingjia shah pynjulor eriong ka la jia ha Mawkajem, kaba don haneng Pynursla, ha ka por kumba 3 baje haduh 6 baje mynta ka step. Ki don kumba 35 tylli eiei ki long-ing kiba shah ktah na kane ka jing shah pynjulor ha ka eriong kynthup ia ka ingmane Catholic, RCLP School bad ka Seng Khasi LP school.

Napdeng kine kaba kham shah pynjulor eh ka dei ka ing jong ka kong Barikmen Tynsong, ha kaba ka lyer kala kit lut ploit naduh ki tnum bad ki jingker ing, kaba kham phylla shuh shuh ka long ba ka lyer ka la kit ruh ia u lyngka uba ki tyngkhap ha jingker ing bad ka leit pynhap pat kumba 100 meter ei ei na kata ka jaka, nangta shuh shuh ka ing jong ka kong Monlang Khongwir kaba lashah lied lut ia ki tnum ing, ka ing jong ka kong Latsubon Buhphang kaba lashah lied ia ki jingker ing bad ka tnum baranda.

Baroh kine ki longing ki dei ki briew ki bym da ioh da kot bha kiba im bylla katba ioh.

Kiwei ki jingpynjulor ki kynthup ia ka jingpait jong ki it ha ki ingskul bad ingmane,ka jingshah pynjulor ki tnum ing, ka jing shah pynjulor ki painkhana jong katto katne ki longing, ki semsniang sem syiar, ki dieng ki siej, ki sainar light, ki kper ki phrah bad ki jaka rep jaka riang, hynrei donbok ba ha kane ka jingjia ym shem ladon kino kino kiba mynsaw, ong ka khubor na  U bah Arban Tynsong, Assistant Secretary jong katei ka Shnong.