Ka jingdawa ka CoMSO ia ka inner line permit

Ka inner line permit system ka dei ka atiar kaban iada ia ka jaidbynriew na ka jingioh rungkyrthep bad ioh shong shnong shyrta jong ki bar jylla bad bar ri ha ka jylla ba pyntreikam ia ka. Ka dei ka atiar kaban iada ia ki trai muluk Riewlum na ka jingshah tyllep noh ha ki heh paid na bar jylla bad barri. U myntri ka Home affair haba u jubab ia ka jingkylli ha Parliament u la ong ba ka jingthmu jong ka ILP system ka long ban iada ia ka Jing ioh rung bad buhai shnong ki bar jylla ha ka jylla ba treikam ka ILP khnang ban iada ia ki trai Ri ha kata ka jylla (the main aim of ILP system is to prevent entry and settlement of other indian national in the state where ILP regime is implement in order to protect the indigineous population).

Ka jingdawa Jong ka confederation of meghalaya social organization (CoMSO) ia ka ILP system ha ka jylla meghalaya kam dei ka kam ba ngi shu leh khlem nongrim. Ha ngi ka ILP kam dei tang ka mat dawa ne ka issue hynrei ngi ngeit ba ka dei ka atiar ban iada ia ka jaidbynriew. Ka sorkar ka la ia kren ia ka mat rung kyrthlep ki poiwir (influx issue) naduh ki snem kiba la dep. Naduh ba ngi don ha ka jylla Assam bad mar sien ioh ia ka jylla Meghalaya ngi la ia kren ia kane ka mat bad mynta la 70 tam ki snem ngi khlem pat ioh ia kita ki jingiada bapura.

 Ha Meghalaya ka jingdawa ban pyntreikam ia ka ILP system kam dei kaba shu sdang na madan madiah hynrei la rai bad ai jingmut da ka High level committee on influx kaba la khieh da u Bah Bindo M Lanong (Dy Chief Minister) ha kaba ki  Minister, MLA, MDC, officer, ki retired IAS, ki sengbhalang, ki proh jabieng bad ki lawyer naduh u Advocate General ka Meghalaya ki la don lang bad ki la ia mir jingmut bha.

Nalorkata lai tylli ki jylla ha north east India (Mizoram, Arunachal Pradesh bad Nagaland) ki la pyntreikam ia ILP . Ka Sikkim ka pyntreikam ia ka RAP bad ka PAP kaba ia syriem bad ka ILP. Ha Andaman & Nicobar Island ruh kum kane ka permit ka don. Ki Ri ka pyrthei kylleng ki pyntreikam ia kum kane ka kyndon ban pyrkhing ia ka jingrung bad buhai ki briew nabar ha ki jaka ba shong ki riewlum khang ban iada ia ki riewlum. Nalor kata ka Manipur Legislative assembly la lai sien lai wat ka la shna ain ban pyntreikam ia ka ILP system ha Manipur, dang ha u snem 2018 ka BJP & NPP government ha Manipur ka dang mynjur ban pyntreikam ia ka ILP. Ha Nagaland dangshen ka sorkar ka la buh da ka special committee kaba kyrpang ban pyrkhat ban pyntreikam noh ia ka ILP ha Dimapur ka nongbah kaba khlem Shem la pyntreikam baroh shi katta.

Kumta, ngi dawa na u myntri rangbah ka jylla u Conrad Sangma ba um dei ban pynkylla political issue ia ka ILP hynrei un pyntreikam noh wut wut ia ka khnang ba kan long ka atiar ka ban iada ia ka jaidbynriew Hynniewtrep bad Garo ha meghalaya.

Khublei shibun,

Robertjune Kharjahrin

Chairman, CoMSO.