Ngam jyllop uwei na ki 3ngut ki rawon, ba leit khwai ha pung Umiam

 Shillong: Uwei u Rangbah ula ngam jyllop ha ka pung Umiam ha ka 15 tarik ha ka por 11 baje mynmiet. Wat la uwei napdeng ki 3 ngut kiba la ia leit lang, ula pyrshang ban iarap, hynrei um shym la lah ban iarap ia la u paralok. Ha kane ka janmiet ki 3 ngut ki Rawon na ka shnong Mawiong Rim, ba kynthup ia u Jolington Lyngkhoi bad u Dispender Lyngkhoi kiba dei shipara ryngkat bad uwei u paralok jong ki, u Refortik Kharmuti ki la hiar sha ka Pung Umiam ban leit khwai doh, hynrei ha ka por mynmiet katba ki dang ia bam ja, kumba ha ka por 11 baje, u Refortik Kharmuti ula kum pynhap ia ka Tiffin ja hapoh um bad katba u dang thmu ban sei ia ka, ka um ka la tan ia u shapoh bad ngam jyllop.

Ha kum kane ka por u Jolington Lyngkhoi ula pyrshang ban iarap ia la u paralok, hynrei na ka jingdum bad ka jingjylliew ka Um, ym shym la lah ban iarap bad pyllait im ia la u paralok. Haka sngi kaba bud kata haka 16 tarik na ka liang ki pulit ki la hiar mar mar sha kane ka jaka ba ngam jyllop u Refortik Kharmuti, kaba hap ha ka bynta ba ju khot ka Ryndang Briew ban wad ia ka met, hynrei haduh ka por janmiet ruh, ym pat lap ia ka met.