“Nga khlain ha baroh hynniew tylli ki District” Hap ia ap ia ka jingmih ha ka 16tarik: PBM

Shillong, 11 Iaiong:
U kyrtong MP shi met ba la kyrshan, da ki ar tylli ki seng sain pyrthei ka KHNAM bad HSPDP, u Pastor PBM Basaiaw moit u ngeit ba un ioh ia ka jingjop ha kane ka kynti ka jingiakhun.
Katkum ka jingia kren bad u Rupang halor kumno u sngew hadien ba la dep ia ka jingthep vote, u Pastor Basaiawmoit u la ong, “Haba la mih madan ban ia mareh, ym long shuh ban phai dien bad hap mareh ban poi sha ka thong”.
“Nga la khlain ha baroh 7 tylli ki district ka Khasi bad Jaintia Hills” la ong biang u Pastor Basaiawmoit haba kylli la u sngew kumno ka lyer hadien ba la dep thep vote. Katkum ka jingia kren iakhana sha rum shaneng, ka lyer elekshon jong u Pastor ka la beh bha na kylleng ki jaka. “Ngam lah ban ong la jop lypa hynrei hap ap ia ka jingmih ha ka 16 tarik Jymmang”, la ong biang u Pastor.
Halor ka jing kylli kiei ki mat ba un leh lada un jop, u Pastor Basaiawmoit u la ong ba u la dep ai sei lypa ia ki mat treikam bad un sa iasaid ban pyndep ban pynrulong ia ki.
Ha ka jingiakren bad ki paidbah, ki la pynpaw ba ki ktem ba khlain jong u Pastor kin long na thain West Khasi Hills namar ba bun ki MLA bad ki MDC ki dei na ka HSPDP kaba kyrshan pura ia u ha kane ka kynti.
Hynrei lada ka long kumba la iakren ba don ki MLA ka Congress ruh ki kyrshan na kiwei ki jaka khamtam na Ri-Bhoi bad ha ki bynta ka East Khasi Hills, bad Jaintia Hills, ka thong sha une u kyrtong shimet, ka lah ban jia shisha.
Ha kawei ka liang pat u Kyrtong ka Congress u Bah Vincent Pala u la ong ba um pat lah ban ioh jingkhein lut halor ka nongrim haei u tlot ne u khlain, hynrei u kyrmen ba un wanrah biang ia ka jngjop ha kane ka kynti.
Katba u kyrtong ka UDP u Bah Paul Lyngdoh ruh u kyrmen un jop. Kiwei kiwei ki kyrtong katkum ka sur ki paidbah ki lah ban poi shadien bad ka jingiakhun ka long hapdeng PBM Basaiawmoit kyrtong shimet, Vincent Pala kyrtong Congress, Shibun Lyngdoh BJP bad Paul Lyngdoh UDP.