Mynsaw lai ngut ki khynnah ba pom u pyrthat

Jowai: Lai ngut ki khynnah, ar ki shynrang, kawei ka kynthei ki la mynsaw hadien ba u pyrthat u la tied hajan ka iing sah jong ki myn hynnin ka sngi U Blei ha ka por kumba 3:30-4:00 pm eiei ha ka por ba ther u lap bah ha ryngkat ka Lyer kaba jur bad ka jingtied u Pyrthat.

Kane ka jingjia ka la jia ha ka shnong, Jalyiah ha ka jaka kaba la tip kum ka Shilliang-Iarain. Uwei u khynnah uba dang shisnem eiei uba dei u khun jong ka kong Hial Dkhar ha ryngkat kawei pat ka khynnah kynthei kaba 11 snem ki la mynsaw malu mala na ka jingiing ding katba uwei pat u khynnah shynrang u la mynsaw jur bad la pynkit mar mar ia u sha Khliehriat CHC bad hadien pat sa sha NEIGRIMS na ka bynta ban ioh ia ka jingsumar kaba biang.