Shillong,11 Iaiong:
Ka la don ka jingia pyni bor hapdeng ki paid bah bad ki pulit CRPF mynta ka sngi, ha kaba uwei u pulit CRPF u SI Jagdish Singh uba dei ruh na ka pyrton D Coy 152 Bn, CRPF Camp Indoor Stadium, Mendipathar (NGH) u la shah bom shah tied ha ki paidbah ka Mendipathar bad kham hadien pat ki pulit CRPF ki la hiar thma kylla ia ki paidbah bad ka jingia pyni bor ka la neh shipor, ha kaba ki CRPF ki la rah ruh ia uwei na ki riew paidbah u Bajrang Baswan sha ka ktem jong ki, hadien kane u paidbah u la tur biang sha ka ktem ki pulit CRPF bad ki la dawa ban pyllait noh ia u Baswan, hynrei kham hadien pat ki pulit jylla, ki la lah ban tem ia katei ka jingjia bad ka jingtohkit ka dang iaid shakhmat.
Katkum ka khubor na ki pulit, la iathuh ba mynhynnin ka sngi ka 10 tarik , utei u SI ki CRPF u la leit sha ing sah jong u Md. Fidha Hussain kaba don ha Mendipathar, bad u la jyllud kti ia ka lok u Hussain bad katei ka jingjia ka dei ha ka por 9:30 baje mynmiet. Ha ka sngi kaba bud kata mynta ka sngi ka 11 tarik
utei u juh u pulit, u la leit biang sha katei ka ing ha ka por 2:15 baje nohphai sngi, bad la ong ba tang mar ia iohi ia utei u pulit CRP ka lok u Hussain ka la lynniar bad pyrta briew, bad tang katto katne por u paidbhur u la poi sha katei ka jaka bad ki la bom la tied ia utei u pulit bad ki la pyrshang ban leit rah ia u sha Mendipathar PS. La iathuh ruh ba tang ha shiteng lynti shuwa ban poi sha thanad pulit, ki CRPF ki la tur bad thombor ia ki paidbah, katei ka la jia ha Indoor Stadium bad ki la ioh ban sei ia u briew jong ki na kti u paidbah. Ki la rah lang ruh ia u Baswan sha ktem jong ki bad ki la bom la tied ia u da ki thri bad ki ktang suloi.
Phi don ban ong eiei?