Shillong,11 Iaiong:
Tang ar sngi hadien ka jingiathep vote, ki kyr tong MP ki la ia bunkam bha ka ia khein ia diah hato ki lah ne-em ban poi sha ka thong bad katno kin ioh vote, ym tang ki kyrtong bad ki agent kiba ia bunkam hynrei wat ki paidbah ruh ki bunkam lang ban wad jingkhein hato u kyrtong ba ki dep ban shon ha ka shap jong u –u lah ne-em ban poi sha ka thong ne mano ban long u MP nangne na Shillong Parliamentary Seat.
La ia kren ha kine ki sngi bad ki nongialam ki seng sain pyrthei bapher bapher, kiba ia tynjuh bor ha kane ka elekshon MP, hynrei ka jubab kaba la ioh na ki jingkhein jong ki ka long beit ba kawei ka seng ruh ka kam ba kan jop, bad kawei ruh ka kam ba kan jop, mar ia kam. Ka ju long katei ka rukom ha ki seng sain pyrthei, hynrei kaba kongsan bad ka jubab kaba biang eh ka dei ka jingtip na ki paidbah jong kito ki jaka ba ki thep ia ka vote, bad khlem pep ha la ki jong ki jaka ki don la ka jong ka jubab.
La wad jingtip na Jaintia Hills District, East bad West kaba u bah Vincent Pala u la tam kput kumba lai shah ban ia u kyrtong uba wan ba-ar u bah John F Kharshiing ha u 2009 bad kumba 50 hajar vote ia u Pastor PBM. Ha Jaintia hills mynta la sngewthuh ba ka vote ka la pra hi phum, ka daw ba nyngkong halor ka jingpra ka vote hangtei ka dei namarba la bun ki kyrtong kiba la ieng na Jaintia hills mynta ka kynti. La ioh jingtip ba hangtei jan ha manla ki konstitwensi ka jingiakhun ka jur bha hapdeng saw ngut ki kyrtong, u bah Pala, u Pastor PBM,
u bah Paul Lyngdoh bad u Ma Shibun Lyngdoh ka BJP.
Lah ruh ban pynkynmaw ba tang na Jaintia hills ha u 2009 u bah Pala u la ioh haduh 62,039 vote, UDP 21,130 bad u Pastor PBM u la ioh tang 13,850, ka jingkylli ba mih mynta ka long hato u bah Pala un dang lah ban ioh biang ia katei ka 62 hajar tam mynta ka kynti, namarba katkum ka jingtip ba la ioh lum kyllum la sngewthuh ba ka jingiakhun ba jur bha ka don hapdeng kitei ki saw ngut ki kyrtong, katba nalor kitei ruh ki don pat kiwei ki kyrtong na katei ka District u bah Denis Siangshai u dei u wei na ki kyrtong ba n a Jaintia Hills ha kaba la sngewthuh ba kum u trai shnong ka vote ruh u don khamtam u dei u riewrim ym shuh uba thymmai ha ka elekshon MP.
Haba phai pat sha East Khasi Hills, hangne ruh la sngewthuh na ka sur paidbah ba ka jingiakhun ka thnem bha hapdeng ki lai ngut , u bah Pala , u bah Paul bad u pastor PBM watla ki don katto katne ki jaka ba u bah Shibun Lyngdoh u khlain. Ha West Khasi Hills ruh ka don ka sur tang ia kitei ki lai ngut ki kyrtong, ha Ri-Bhoi ruh kumjuh. Haba wad jingtip pat na ka liang ki paidbah, halor ka jingneh ka vote rim ki kyrtong la sngewthuh ba ka vote rim kam shong skhem shuh
bad ka don ka jingia khih phaloh shane shatai, bad katei ka vote rim la sngewthuh ba ka jur bha ka jingiapra hapoh ka seng Congress.
Phi don ban ong eiei?