Da U Nongaikhubor
Shillong: Katba ka tnad ialehkai ka dang don ha ka lynti ban pynkhreh ban pynbit pynbiang kumno ba kan lah ban pynlong ia ka National Games 2022, ha kine ki khyndiat sngi la ioh khubor ba ki nongialam ka Meghalaya Swimming Association (MSA) kiba la shimwai na ka State Sports Council ki la khanglad ia ki samla ka shnong Malki ban shah hikai jngi ha katei ka jaka jngi jong ka sorkar jylla.
Kane ka jingshah khang ka la pynbitar lep ia bun bah ki samla ka shnong Malki, khamtam haba ki samla na ka shnong Malki, ki ba la pyntbit ialade ha ka kam hikai jngi ki shah khang ha kane ka jaka jngi kaba ha ki por barim ki samla ka shnong ki ju jngi bad hikai katba mon ha katei ka jaka.
Ha kaba iadei bad kane u nongai khubor u la pyrshang ban ioh iakren bad ki ophisar ka tnad ialehkai ha kaba iadei bad kane ka kam, hynrei ym shym la iohlad satia ban shu iakren da ka phone. Hynrei lah ban pynkynmaw ba kane ka jaka jngi ka la mih bun bah ki kynrum kynram ha ki bun snem kiba la leit bad ym lah ban tip la ka sorkar kala pynbeit ne em ia kane ka kam namar la mih bun bah ki jingkynnnoh bad jingkynthoh ha kaba iadei bad kane ka jaka jngi.
Lah ban pynkynmaw ruh ba u myntri ka tnad ialehkai u bah Banteidor Lyngdoh ha kawei na ka jingleit jngoh jong u, u la kynthoh ba kane ka Crinoline Swimming Pool kam long satia ka pung jngi kaba ibit namar ka jingbymbiang ka rukom pyniaid bad ka jingkren sngewkhia ruh halor ka jingbymdon ki Life Guard ne ki nongai jingiada ba kyrkieh ia ki briew kiba wan jngi ha kane ka pung la da jia ba kin ngat ha kano kano ka jing ngam jyllop.
Shuhshuh la ioh khubor ba ki samla na ka shnong Malki kin sa leit ban tuklar ia kane ka jingleh donbor jong ki nongpyniaid ban khanglad ia ki samla na ka shnong Malki kiba la register ialade bad ka State Sports Council ban jngi ne ban hikai ha katei ka jaka.
Phi don ban ong eiei?