NNSSCC: Mynta ka sngi ka semi phainal ba khatduh hapdeng ka Laban pyrshah ia ka Assam Regiment

Nongstoiñ: Ka jingiakhun semi phainal ba khatduh ha pdeng ka Laban pyrshah ia ka Assam Regiment kan long biang mynta ka sngi ha ka madan ialehkai jong ka shnong New Nongstoiñ ka ban sdang ruh ha kapor 2:00 baje nohsngi. 

 Katei ka jingiakhun semi phainal ba khatduh jong ka lympung 2nd Invitation Knock out Football Tournamement bala pyniaid da ka New Nongstoiñ Sport Social Cultural Club (NNSSCC) ha pdeng kitei ki ar kynhun ka dei ruh ka jingiakhun ia ka kylla kaba ar.

 Kum ban shu pynkynmaw ba ha ka jingiakhun ha ka kylla kaba nyngkong, ka Assam Regiment ka la ioh ban tam tang da 1 kol ia ka Laban bad mynta ka jingiakhun ka long ban pynioh ia u nam tam khnang ban ioh rung sha ka phainal ban ioh ia kynduh pat sa ia ka Umiam United kaba la ap phainal lypa.

 Kumta na ka liang jong ka NNSSCC ka khot ka wer biang ia baroh ki paid riew ieid phutbol jong ka thain ba kin wan ban sakhi biang ia katei ka jingiakhun bad lah ruh ban ong ba katei ka jingiakhun khlem pep kan long kaba itynnad bha.