Byrngem pyniap u kandidet BJP ialade

Bah Monarch Shabong

Ka jingkren u kandidet BJP, haba shu sngap thuh, ka la khor eh, ha kaba un byrngem noh ban pyniap ialade, lada pyntrei kam ia ka Citizenship Amendment Bill (CAB) bad katei ka jingkren, lada shu sngap, ka lah ban wan rah ia ka jingsngew bapher jong ki nong thep vote, ha ka sngi thep vote, kaba la shim ba ka dei ka sngi kaba lait na kino kino ki jingshah pynbor ne jingshah pynbiej jong ki paidbah nongthep vote.
Katei ka dei kawei; nangta, sa kawei pat ka bynta ka long ba kat u nongmihkhmat paidbah, lada un pyniap ialade, na ka daw jong ka jing pyntreikam ia ka ain CAB, ka long ka bym lah ban pdiang satia, namar ba ula dei ban pyneh beit triang, kum u nong ialam, da ka bor jong ka ktien bad da ka bor jong ka kam, hynrei lada jia ba ialade um don shuh, kumta, katei ka pyni, ba u sngewhun pynban ba kiwei kin jynjar bad ba ialade, un lait ka shah peit matdong, namar ba um lah ban ialeh pyrshah ia katei ain.
Ngim tip, la ka tnat elekshon, ka pyrkhat kumno halor katei ka jingkren jong U bah Shullai, hynrei, ka dei shisha ka rukom kren ka bym sngew tynnad bad ka bym sngew iahap ruh, na ka kyrdan jong utei u nongialam, uba la ih bha bad uba don ha ka lyngkor kum u nongialam paidbah ha ki phew phew snem ba ladep bad ngin dang ia peit ruh ia kaei, kaba kiwei pat ki seng sain pyrthei, ki kandidet, ki don ban kynthoh halor kane ka jingkren jong u nongialam jong ka seng ba heh duh ka Ri India.
Ha katei ka jingkren, la iohi, ba kumba U Bah Shullai, u don ha ka jing sngew kutlad kaba jur lane lehse lah ban ong ba u sngew myllung mynsiem (full of emotions), halor katei ka phang bad kata ka long, ba ka mat ilekshon jong katei ka seng, kaba u ialeh, ka la mih dier por eh, ynda haba ula dep mynjur ialade ban iakhun na ka tiket jong katei ka seng bad kata ka dei ka mat, kaba dei bad ka jing kular jongka, ban pyntrei kam beit shakhmat ia ka CAB, lada kan wan biang ha ka sorkar India ha u snem 2019.

Lah ban pynkynmaw ba ka dei ruh halor katei ka mat, kaba U bah Shullai, ula kren pyrshah jur bha ha ki khyndiat bnai ba ladep bad ha kaba ula dep buh por shibnai ia ka sorkar BJP, ba kan weng ia katei ka ain, lane ba ula byrngem tyngeh (ha madan Student) ba un mih noh ialade na katei ka seng, halor katei ka mat kaba u shim, ba kaba ialeh pyrshah Jaitbynriew.