Nongstoiñ: Ki paidbah nong shong shnong ka shnong Mawlum-Nginiong ki la kyntait ban leit thep vote na ka bynta ka jingjied ia u MP sha Lok Sabha bad kane ka rai la mynjur da ka Dorbar shnong ban nym iashim bynta ha kane ka ilekshon namar ka jingjah kyrteng jong ka shnong ha ka Electoral Roll. Kane ka jingbym leit thep vote ka la mih, na ka liang jong ki katto katne ki nongshong bad kumjuh na ki nongialam shnong ha kaba ki la ia rai ha ka 9 tarik mynta u bnai bad ki khubor ki la iathuh haba wad bniah ia ka daw tynrai jong katei ka jingbym treh leit thep vote ki paidbah ka shnong Mawlum-Nginiong ka dei ba la don ka jingbym ia sngewthuh jingmut bad ka jingiakam trai ia ka shnong ha pdeng ki ar tylli ki shnong kata ka Mawlum-Nginiong bad ka Mawlum ramkdait kiba dei kajuh ka shnong bad kiba mih ruh na ka shnong kmie ka shnong Nginiong.
U bah N.K Nongbri u la ong ba iaka shnong jong ki kata ka Mawlum-Nginiong la seng naduh u snem 1998 da ka shnong Nginiong kaba dei ka shnong kmie bad ka la iaid ruh mynta la kumba 20 snem eiei ka shnong ka la rung ruh hapoh ka census naduh u snem 2001, hynrei ha u snem 2011 pat ka census ruh kala jah khem da tip kumno ka jah.
Shuh shuh u bah Nongbri u la iathuh ba dei ha u snem 2016 ba katei ka shnong kala ioh ia ka Electoral Roll ha ka kyrteng ba pura jong ka shnong Mawlum-Nginiong bad ki paidbah nongshong shnong ruh kila ioh ia ki dur thep vote (Epic) ha katei hi ka kyrteng shnong hynrei ha u snem 2017 pat ka kyrteng shnong kala jah noh bad kila shah pynrung lang noh sha ka shnong Mawlumramkdait.
Hadien, ki la leit ruh ban iakynduh ia u DC ha kaba iadei bad ka jingjah noh ka shnong na ka Electoral Roll bad ba shah pynngat lang sha Mawlum ramkdait bad na ka liang jong u DC u la ong ba namar ba ka don ha pdeng jong ka jingia huri hura kumta hap ieh shwa kum ka shnong Mawlum kaba dei ka kyrteng ba nyngkong duh, hynrei hadien pat la pynkylla noh sha ka Mawlumramkdait bad u la thep lang ia ki jong ka Mawlum-Nginiong ruh ha katei ka kyrteng Mawlumramkdait bad ki khlem pdiang ia kata” ong u bah Nongbri
U la ong ruh ba ha kapor jong ka jing jied MDC ka Polling Station ka la mih ha ka kyrteng Mawlum-Nginiong, hynrei mynta ka MP ilekshon pat ka la jah noh bad shah pynngat lang sha ka Mawlumramkdait bad dei halor katei ka nongrim ba ki la rai ban nym thep vote bad u bah Nongbri u la kynnoh ruh ba ka Mawlumramkdait, ka dei ka shnong kaba shu mih kumto khlem ka jingithuh na u Syiem bad u ong ba u don ka jingthoh ban pynshisha hynrei na ka liang jong ki ophis bad ki bor sorkar pat kila kohnguh ia ka shnong. Na ka liang jong u bah Korin Lyngkhoi Sordar ka shnong Mawlumramkdait u la pynshai ia katei Da kaba u la ong ba naduh mynshwa ka don tang kawei ka shnong kata ka Mawlum kaba mih bad kha na ka shnong Nginiong kaba dei ka shnong kmie, hynrei ha u snem 2006 ka Dorbar pyllun baroh kawei kala rai ban pynkylla noh ia ka kyrteng na ka Mawlum sha ka Mawlumramkdait bad ia katei ka jingshim rai Kam shymla don satia kano kano ka jingpyrshah ne jingia mong bad kala iaid beit khlem jingwit jingwoh.Naduh bala pynkylla ia katei ka kyrteng shnong kala iaid haduh 4 snem bad kynsan kynsan ka la sdang mih ka jingbym ia sngewthuh jingmut bad jingiapait ia pra bad mih artylli ki shnong kata sa ka Mawlum-Nginiong bad ngi la ia pyrshang ruh ban ia pynbeit bad pyrshang ban ia sngewthuh jingmut hynrei kim mon bad katei ka rai ban nym thep vote ruh ka dei ka jingbym mon ka jong ki hi” ong u bah Lyngkhoi.
Ha kaba iadei bad ka jingkynnoh u bah Nongbri na ka liang u Sordar ka Mawlumramkdait u la kyntait bad u la ong ruh ba wat na ka liang jong ka ophis DC ruh ka ithuh beit ia ka shnong Mawlumramkdait naduh ki job card, ration card bad kumjuh ka Electoral Roll bad u la ong ruh ba ia u la ithuh kum u Sordar ka shnong Mawlumramkdait bad u don ruh ia ka sanat na u Syiem ban pynshisha bad kiwei kiwei de ki kot ki sla ban pynshisha bad pynskhem ba ka Mawlumramkdait kadei ka shnong kaba dei hok ban ioh ia ka Electoral Roll bad kiwei kiwei de ki kam kiba iadei bad ki bor ophis bad sha u Syiem.
Phi don ban ong eiei?