Tura:Ki dkhot jong ka North-Eastern Hill University Students Union (NEHUSU), Shillong, ki la pynjot ia ka jaka sah jong U G Singhaiah, Pro Vice Chancellor (PVC) jong ka University, kaba don ha Tura, West Garo Hills.
La iathuh ba kitei ki samla pule, kiba don 9ngut ki la ktah kti ruh ia ki 7ngut ki nongbylla kiba trei ha katei ka campus.
Ki lad khubor ki iathuh ba ki bor pyniaid ka Tura campus, ki la ai jaka sah ia kitei ki 9ngut ha University Guest House, ha ka jing iakren bad U President ka Post Graduate Students’ Union (PGSU), NEHU Tura Campus.
La iathuh ba ha ka sien ba nyngkong, ha ka 6tarik Iaiong, kitei ki 9ngut ki la leit sha ka jaka sah ki samla pule kynthei ha Norombi PG Girls Hostel, ha ka por 7.45 janmiet, khlem da iathuh lypa ia ki bor pyniaid. Kitei ki samla hangta ki sdang ban ia hylla, kyrkait ha khmat ka jaka sah jong U Pro Vice Chancellor (PVC), u bym don satia ha ka jaka sah jongu ha katei ka por. Hadien katei ha ka 7tarik, kitei ki 7ngut ki samla pule, ki leit biang sha ka jaka sah jong U PVC, ha ka plr 3.15baje janmiet bad hangtei ki kawang maw bad pynjot ia ki bynta jong ka iing sah jongu, ong ka kyrwoh na ka nongai khubor jong ka NEHU. Ka kurim jong U PVC, kaba don marwei ha ka jaka sah, ka la tieng bad khynniuh that that bad ka la phone ia u kurim jongka, uba dang wan phai sha Tura bad ym tang katta, hynrei ki la byrngem ia u pulit uba pahara, namar ba ula mai ia ki, ba ki pynjot ia katei ka iing sah jong U PVC. Hadien kata, ha ka por 4baje kitei ki juh ki samla pule, ki la ktah kti ia ki 7ngut ki nong bylla kiba trei iing ha katei hi ka jaka, ong katei ka kyrwoh.
Ha katei ka por, U PVC, uba la wan poi sha Tura, ula kren ia U SP ka West Garo Hills bad nangta, ula wan sa U Proctor jong ka NEHU bad ki pulit ki la shim sakhi halor katei ka jingjia, ha kaba kitei ki nongshoh ruh, ki la mynjur ia kaei kaba ki la leh baroh.
Phi don ban ong eiei?