Wer ka seng Khasi sha ka Shad Suk Mynsiem ba 104

Shillong, 10 Iaiong:
Ka Seng Khasi Kmie ka wer ia ki rang bad ki thei sotti jong ka bri Hynñiewtrep Hynñiew skum ba kin ia wan ha kaban iashim bynta sha ka Shad Suk Mynsiem kaba 104. Kane ka shad ba lai sngi lynter kaba juh long man la ka snem kan sdang naduh ka 12, 13 bad ka 14 tarik mynta u bnai ha lympung Weiking Jaiaw. Kane ka shad ka dei ka dak ai nguh u khun bynriew iala U Blei nongbuh nongthaw, halor ka jingkyrkhu kaba u la theh sei ia u khun bynriew.
Kumta u bynriew kum ka dak ban ainguh iala U Blei u sei kein ka khroh ka khriam ka ksiar ka rupa ban phong ban kup ban deng ban iuh kjat ha lympung ban shad ban mastieh ha ryngkat ki hynniew tylli ki sur jong ka ksing bad ka tangmuri.
Kumba ka juh long ha ka sngi ba nyngkong ba ju tip ia ka kum ka Sngi Nohkjat, yn sdang ia kane ka shad da ka nguh ka dem napoh phyllaw iing ka Seng Khasi Mawkhar, hadien kane ki nongshad shynrang ryngkat ki duhalia kin tem bad shad wait arted lynti tad haduh ban da iuh kjat ha lympung Weiking, hynrei ha shwa ban sdang pat ia ka shad ka kmen, u tymmen u san un shim ia ka bynta ban nguh ban dem halor ka duwan ba la shna kyrpang hapdeng jong ka madan, hadien kane yn sa kyntiew ia ka lama bad ban sa sdang pat ia ka shad ka kmen.