Nongpoh: Ka kynhun ki nong niah Auto ha Nongpoh, hapoh ka lama jong ka Nongpoh Region Auto Owners & Driver’s Association (NRAO&DA), hynnin ka sngi ki la leit ban kynduh ia u Bah I Khar mon, DTO ka Nongpoh ban pan jingpynshai halor jingeh kaba ki la iakynduh hapoh katei ka ophis treikam tang namar ka jingbym thikna ka rukom wan u MVI uba don hapoh katei ka ophis u DTO ha Nongpoh.
Ki nongialam ka NRAO&DA kiba la leit kynduh ia u DTO hynnin ka sngi ha Nongpoh
Ha kane ka jingleit kynduh ia u DTO ka Nongpoh, la ialam da u Bah Marcus Marten, President ka NRAO&DA, ha ryngkat ka jingsyllang kiwei ki nongialam kaba kynthup ia u Bah Joseph Syngkli lem bad kiwei ki nongniah Auto, ha kaba ki la ioh ban pynpaw ia shibun ki jingeh, kaba kum ki trai kali lane ki nongniah Auto, ki ju iakynduh jingeh ha ka por ba ki thmu ban leit pynthymmai ia ki kot ki sla kali.
Haba kren sha ki nongthohkhubor, u Bah Marcus Marten, u la ong ba kum u nongialam ia ka synjuk ki nongniah Auto, um lah khlem da pynpaw ia ka jingsngewkhia ban tip ia katei ka jingeh kaba la iakynduh da ki trai bad nongniah Auto, tang namar ka jingbym thikna ka rukom wan treikam da u MVI ha katei ka ophis u DTO.
U la ong ruh, ba kane ka jingbym thikna ka rukom wan da u MVI, ka pynshem jingeh shikatdei eh ia ki trai bad khamtam eh ia ki nongniah Auto, kiba kwah ban leh hi ia ki kot ki sla.
U Bah Marten, u la ong ruh ba katkum ka jingiathuh da ki Nongniah Auto, la ong ba ha ka por ba ki trai bad nongniah Auto, ki mut ban leit leh ia ki kot kali, ki mih shibun ki daw na katei ka ophis treikam u DTO, ha kaba bunsien hi la shu aidaw beit da kata ka jingbym don Link bad kaba la pynlong ba ki briew kiba thmu ban pyndep ia ki kot ki sla jong ki kali ki hap ban sahteng noh.
Shuh shuh, u la ong ruh, ba ka synjuk ki nongniah Auto, ka sngewlyngoh ban tip ba watla ka ophis u DTO ka pynmih ia shibun ki daw ha ka por ba ki trai kali lane lane ki draibar ki thmu ban leit pynthymmai ia ki kot ki sla kali, hynrei kam don jingthut ei ei lada kip hah leh ha ki Dalal kiba don hapoh jong katei ka ophis treikam, ha kaba ki lah ban pynioh wat tang hapoh shisngi bad kane hi ka la pynlyngoh shikatdei eh ia kiba bun ki trai bad ki nongniah kali, u la ong.
Hadien katei ka jingkynduh DTO, na ka liang ka synjuk ki nongniah Auto, ki la pynpaw ia ka sur bad kyntu ia ka sorkar ba ka dei ban shimkhia ha ka ban bujli noh da uwei pat u MVI hapoh katei ka ophis treikam, namar utei u MVI uba don mynta um shem la lah ban pynbiang ia ka jingdonkam jong ki paidbah ba bun balang bad kaba la pynlong ia kiba bun ki paidbah ba kin shem jingeh ha ka por ba ki thmu ban leit pynthymmai ia ki kot ki sla kali, u la bynrap.
Phi don ban ong eiei?