Sin U Conrad ia ka sorkar U Mukul kum ka JCB

Shillong: U President ka NPP u Conrad K Sangma u la kynnoh ba ka sorkar barim ba ialam da u Dr Mukul Sangma ba ka long kum ka JCB kaba shu kyntur naphang katba ka sorkar MDA kaba ialam da ka NPP mynta, ka long kum ka trok Dumper kaba theh sha ki paidbah.
Haba kren ha ka jingialang paidbah jong u kyrtong ka MDA u Dr.Jemino Mawthoh kaba la long mynta ka sngi ha Madan Polo, u Conrad K Sangma u la ong ba ha ka por ka sorkar jong u Dr.Mukul Sangma, u kpa jong u, u Purno A Sangma u la kylli na uwei na ki myntri sorkar kumno ki lap ki shem ia ka sorkar u Dr.Mukul hynrei u la ong ba ki la jubab kaba ai da uta u myntri sorkar ba iadon lang bad u Mukul, uba dei ruh ha kane ka sorkar MDA, ka long, “Kane ka sorkar te sahep, ka dei ka sorkar JCB, u Dr.Mukul u shu khat beit ym don ba nud ban kren eiei ne leh eiei”.
Hynrei da kaba kam ba kane ka sorkar MDA , ka dei kum ka Dumper, u Conrad u la iathuh ba don uwei u nongialam na Garo u la ong ba ka sorkar u Mukul dei ka sorkar JCB hynrei kane ka sorkar mynta pat dei ka sorkar Dumper kaba mut ba ka dei ka sorkar ka ban theh lut sha ki paidbah.
Ha ka jingialang kaba la long ha Madan Polo, la don wan iadon bynta lut ki nongialam rangbah jong ki seng kiba don hapoh ka kynhun jong ka sorkar MDA ba kynthup naduh u Dr.Donkupar Roy u President ka UDP, u bah K.P Pangniang u President HSPDP, u bah Prestone Tynsong Dy. Chief Minister, u bah Ivanlum Marbañiang u President ka PDF, u ba Lambor Malngiang u MLA shimet.
La donlang ruh ki myntri ka sorkar MDA, ki MLA ki Chief Execvutive Member na ki ar tyll ki District Council JHADC bad KHADC, ki MDC na baroh 2 konstitwensi bad kiweipat ki nongialam Party jong ki Party bapher.